चितवन । प्रतिनिधिसभा निर्वाचन २०८२ का लागि चितवनमा ३४ मतदान केन्द्र थपिएका छन् ।
प्रतिनिधि सभा निर्वाचन २०७९ मा भन्दा अहिले हुन लागेको निर्वाचनमा मतदाता थपिएसँगै जिल्लामा मतदान केन्द्र थप भएका हुन् ।
जिल्ला निर्वाचन कार्यालयका प्रमुख भीमसेन कार्कीका अनुसार गत निर्वाचनमा जिल्लामा ४६० मतदान केन्द्र रहेकामा आगामी फागुन २१ गते हुने निर्वाचनमा ४९४ केन्द्र कायम गरिएको छ ।
त्यसमा क्षेत्र नम्बर १ मा एक सय ६८, क्षेत्र नम्बर २ मा एक सय ५२ र क्षेत्र नम्बर ३ मा एक सय ७४ मतदान केन्द्र कायम गरिएको छ ।
उनका अनुसार मतदानस्थल भने थप भएका छैनन् । गत निर्वाचनमा कायम रहेका एक सय ६२ मतदानस्थल नै कायम गरी केन्द्र थप गरिएको उनले जानकारी दिए ।
उनले भने, “मतदान केन्द्र थपिएका छन्, स्थल भने पहिलाको नै हो ।”
क्षेत्र नम्बर १ मा ५६, क्षेत्र नम्बर २ मा ४३ र क्षेत्र नम्बर ३ मा ६३ मतदानस्थल रहेको उनले जानकारी दिए ।
यस वर्षको प्रतिनिधि सभा निर्वाचनमा जिल्लामा चार लाख ४२ हजार ८२ मतदाता रहेका छन् ।
प्रतिनिधि सभा निर्वाचन २०७९ मा जिल्लामा चार लाख आठ हजार ३४२ मतदाता रहेका थिए ।
उनले ३३ हजार सात सय ४० जना मतदाता थपिएको बताए।
क्षेत्र नम्बर १ मा एक लाख ४९ हजार छ सय २१, क्षेत्र नम्बर २ मा एक लाख ३७ हजार एक सय ५२ र क्षेत्र नम्बर ३ मा एक लाख ५५ हजार तीन सय नौ मतदाता कायम भएको उनले बताए ।
