काठमाडौँ । नेपाली कांग्रेसले पार्टीका निवर्तमान सभापति शेरबहादुर देउवाले लामो समय पार्टीमा गरेको नेतृत्वप्रति आभार व्यक्त गरेको छ ।

शनिबार काठमाडौँमा बसेको पार्टीको नवनिर्वाचित केन्द्रीय कार्य समितिको बैठकले देउवाले पार्टीमा पुर्याएको योगदानको उच्च कदर गर्दै आभार व्यक्त गरेको हो । 

उनले पार्टीमा पुर्याएको योगदानको मूल्यांकन गर्दै बैठकले आभार व्यक्त गर्ने निर्णय गरेको पार्टीका प्रवक्ता देवराज चालिसेले जानकारी दिए ।

बैठकले पदमा नरहेर पनि पार्टीमा नेतृत्व प्रदान गर्दै आएका नेताहरूबाट आगामी दिनमा पनि अभिभावकीय भूमिका अझ बढी सक्रिय भएर लाग्न आग्रह गरेको छ ।

बैठकले कुनै पनि अप्राकृतिक गठबन्धन र सत्ताका लागि सम्झौता नगर्ने प्रतिवद्धतासमेत व्यक्त गरेको प्रवक्ता चालिसेले बताए ।

उनले भने, ‘यो अवस्थामा विशेष गरेर पार्टीमा निश्क्रिय रहनु भएका हाम्रा साथीहरू, विभिन्न कारणले पार्टी छाड्नु भएका साथीहरूलाई हामी फेरी पनि पार्टीमा जोडिनका लागि यो बैठकले आह्वान गरेको छ। राजनीतिमा चासो राख्दै यसको माध्यामबाट देशले परिवर्तन गर्न सक्छ भन्ने मान्यतामा विश्वास गरेर नेपालीकांग्रेसको नेतृत्वमा अगाडि बढने प्रक्रियामा साथ र सहयोगका लागि देशवासीहरूबाट साथ प्राप्त हुने विश्वास पनि यो बैठकले राखेको छ। विशेषगरी हाम्रा आदरणीय पूर्वसभापति श्री शेरबहादुर देउवाज्यूले लामो समयसमम नेपाली कांग्रेसको नेतृत्व लिनुभयो । योगदान पुर्याउनुभयो । उहाँको हार्दिकतापूर्वक उच्च कदर गर्दै उच्च मूल्यांकन गर्दै उहाँका प्रति हार्दिक आभार व्यक्त गर्ने निर्णय यो बैठकले गरेको छ । र, उहाँकाप्रति आगामी दिनमा यो केन्द्रीय समिति र नेपाली कांग्रेसलाई आदरणीय शेरबहादुर देउवाज्यूको अभिभावकीय भूमिका प्राप्त हुने विश्वास हामीले राखेका छौँ । यसै गरेर हाम्रा अग्रज नेताहरू जो हाम्रा पार्टीको विभिन्न पदमा हुनुहुन्न । तर पनि पार्टीको नेतृत्व दिइआउनु भएको छ । सबै आदरणीय नेताहरूको भूमिकालाई अझ बढि सक्रियताका साथ पार्टीमा लागिरहनु पनि हामीले अनुरोध गरेका छौँ । अन्त्यमा नेपाली नागरिकप्रतिको आफ्नो अटल प्रतिवद्धतालाई पुनः दोहोर्याउन चाहन्छ कि अब कुनै अप्राकृतिक गठबन्धन वा सत्ता केन्द्रित सम्झौता हामी गर्ने छैनौँ भनेर फेरी पनि हामीले कमिटमेन्ट गरेका छौँ । सबै सदैव मूल्य र सिद्धान्तमा अडिग रहनेछौँ । संविधानको रक्षा गर्दै समृद्ध नेपालको नेतृत्व गर्नेछौँ । नवयुवाको आकांक्षा विशेष गरेर जेन जी आन्दोलनपछि नव युवाको जुन आकांक्षा छ। त्यो आकांक्षाको प्रतिनिधित्व गर्दै जनताको अपेक्षालाई साकार पार्न यो  बैठकले आफ्नो दृढता व्यक्त गरेको कुरा यहाँहरू समक्ष निवेदन गर्न चाहन्छु ।’

बैठकले मुलुकलाई समृद्ध बनाउने नेतृत्व आफूहरूले गर्ने भन्दै साथ दिन पनि सबैमा अपील गरेको छ ।