म्याग्दीमा प्रतिनिधि सभाको चुनावी भिडन्त: एमालेका हरिकृष्ण र कांग्रेसका कर्णबहादुर मैदानमा
म्याग्दीमा अर्जुन थापा, युवराज रोका र ध्रुव घिमिरेको 'डेब्यु' निर्वाचन
हाम्रा कुरा
प्रकाशित २०८२ माघ ६ मंगलबार
682
Shares
काठमाडौँ । आगामी फागुन २१ गते हुने प्रतिनिधि सभा सदस्य निर्वाचनका लागि म्याग्दी जिल्लामा प्रमुख राजनीतिक दलहरूले आफ्ना उम्मेदवारहरूको टुङ्गो लगाएका छन्। एक निर्वाचन क्षेत्र रहेको यस जिल्लामा यसपटक मुख्य दलहरूबीच रोचक प्रतिस्पर्धा हुने देखिएको छ।
नेकपा (एमाले) ले पार्टीका केन्द्रीय सदस्य हरिकृष्ण श्रेष्ठलाई उम्मेदवार बनाएको छ। श्रेष्ठ विसं २०७९ को निर्वाचनमा नेपाली कांग्रेसका खमबहादुर गर्बुजासँग झिनो मतान्तरले पराजित भएका थिए। त्यस्तै, नेपाली कांग्रेसले जिल्ला उपसभापति कर्णबहादुर भण्डारी (केबी) लाई चुनावी मैदानमा उतारेको छ। पुष्पकमल दाहाल 'प्रचण्ड' र माधवकुमार नेपाल नेतृत्वको नेपाली कम्युनिष्ट पार्टी (नेकपा) का तर्फबाट ३६ वर्षीय युवा नेता एवं सामाजिक अभियन्ता अर्जुन थापा उम्मेदवार बनेका छन्। थापा १० हजारभन्दा बढी बिरामीलाई रगत उपलब्ध गराउने सामाजिक कार्यमा सक्रिय रहँदै आएका छन्।
राष्ट्रिय स्वतन्त्र पार्टी (रास्वपा) ले जिल्ला सभापति युवराज रोकामगरलाई उम्मेदवार बनाएको छ भने नेकपा (माओवादी) बाट पोलिटब्युरो सदस्य एवं जिल्ला इन्चार्ज ध्रुव घिमिरेले उम्मेदवारी दिने भएका छन्। एमालेका श्रेष्ठबाहेक अन्य चारै जना मुख्य प्रतिस्पर्धीहरू पहिलो पटक प्रतिनिधिसभा निर्वाचनमा होमिएका हुन्। यसपटक जिल्लामा कुनै पनि दलले गठबन्धन नगरी एक्लाएक्लै चुनाव लड्ने तयारी गरेका छन्।
म्याग्दीमा आगामी निर्वाचनका लागि ८६ हजार ३ सय ९७ मतदाता कायम भएका छन्, जसमा ४२ हजार ३ सय ३२ पुरुष र ४४ हजार ६४ महिला रहेका छन्। निर्वाचनका लागि जिल्लाभर ८२ वटा मतदानस्थल र १२० वटा मतदान केन्द्रहरू तोकिएका छन्। जिल्ला सुरक्षा समितिले १५ वटा मतदानस्थललाई 'अति संवेदनशील' वर्गमा राखेर सुरक्षा प्रबन्ध मिलाएको छ।
