काठमाडौँ । अमेरिकी राष्ट्रपति डोनाल्ड ट्रम्पले दक्षिण कोरियाली सामानमा भन्सार शुल्क बढाउने घोषणा गरेपछि दक्षिण कोरियामा खैलाबैला मच्चिएको छ। अटोमोबाइल, काठ र औषधि लगायतका सामग्रीमा कर १५ प्रतिशतबाट बढाएर २५ प्रतिशत पुर्‍याउने ट्रम्पको चेतावनीपछि कोरियाली सरकारले मंगलबार आपत्कालीन बैठक बोलाएर स्थितिको मूल्याङ्कन गरेको छ।

राष्ट्रपति ट्रम्पले दक्षिण कोरियाली व्यवस्थापिकाले वासिङ्टनसँग भएको ऐतिहासिक व्यापार सम्झौता पूर्ण रूपमा पालना नगरेको आरोप लगाएका छन्। उनले सामाजिक सञ्जाल 'ट्रुथ सोसल' मार्फत कोरियाली संसद्ले सम्झौता लागू गर्न ढिलाइ गरेकाले कर बढाउने निर्णय लिनुपरेको दाबी गरे। यद्यपि, दक्षिण कोरियाको राष्ट्रपति कार्यालयले भने यस्तो वृद्धिबारे आफूहरूलाई कुनै आधिकारिक पूर्वसूचना नआएको स्पष्ट पारेको छ।

सियोलमा बसेको आपत्कालीन बैठकमा हाल क्यानाडामा रहेका व्यापार तथा उद्योग मन्त्री किम जङ्ग–क्वान भर्चुअल माध्यमबाट सहभागी भएका थिए। बैठकपछि जारी विज्ञप्तिमा दक्षिण कोरियाली सरकारले सम्झौता कार्यान्वयनप्रति आफ्नो प्रतिबद्धता दोहोर्‍याउँदै यस विषयमा शान्त र संयमित भएर प्रतिक्रिया दिने बताएको छ।

सरकारले यो कर वृद्धि तत्काल लागू नहुने र प्रशासनिक प्रक्रियाहरू बाँकी रहेको विश्वास व्यक्त गरेको छ। स्थितिलाई साम्य पार्न व्यापार मन्त्री किम चाँडै वासिङ्टन गएर अमेरिकी वाणिज्य मन्त्री हावर्ड लुटनिकसँग भेटवार्ता गर्ने तयारीमा छन्।

गत अक्टोबरमा दक्षिण कोरियाली राष्ट्रपति ली जे म्युङ र ट्रम्पबीच भएको सम्झौताअनुसार दक्षिण कोरियाली कारहरूमा लाग्ने २५ प्रतिशत शुल्क घटाएर १५ प्रतिशतमा झारिएको थियो। तर, उक्त सम्झौता दक्षिण कोरियामा अझै कानुनी रूपमा लम्बित छ। सियोलले यसलाई 'समझदारी पत्र' मात्र भएको भन्दै संसदीय स्वीकृतिको आवश्यकता नपर्ने तर्क गरे पनि ट्रम्पले भने संसद्को अवरोधलाई मुख्य मुद्दा बनाएका छन्।

अमेरिकामा दक्षिण कोरियाको कुल निर्यातको करिब २७ प्रतिशत हिस्सा अटोमोबाइल क्षेत्रले ओगटेको छ। यदि ट्रम्पको घोषणा कार्यान्वयन भएमा दक्षिण कोरियाली कारहरू जापान र युरोपेली सङ्घ (ईयू) का उत्पादनभन्दा महँगा हुनेछन्, जसले गर्दा बजारमा कोरियाको प्रतिस्पर्धात्मक क्षमता कमजोर हुने विश्लेषकहरूको भनाइ छ।

ट्रम्पले पछिल्लो समय क्यानाडा र युरोपेली राष्ट्रहरूलाई पनि यस्तै किसिमका व्यापारिक धम्कीहरू दिँदै आएका छन्, जसले विश्व बजारमा नयाँ 'ट्रेड वार' (व्यापार युद्ध) को संकेत गरेको छ।