ट्रम्पको भन्सार वृद्धि योजनाबारे आधिकारिक जानकारी प्राप्त नभएको कोरियाको भनाइ
हाम्रा कुरा
प्रकाशित २०८२ माघ १४ बुधबार
2k
Shares
काठमाडौँ । अमेरिकी राष्ट्रपति डोनाल्ड ट्रम्पले दक्षिण कोरियाली आयातित वस्तुहरूमा भन्सार शुल्क १५ प्रतिशतबाट बढाएर २५ प्रतिशत पुर्याउने घोषणा गरेपछि दुई देशबीच व्यापारिक तनाव चुलिएको छ।
ट्रम्पले सोमबार सामाजिक सञ्जालमार्फत दक्षिण कोरियाली व्यवस्थापिकाले द्विपक्षीय व्यापार सम्झौता लागू गर्न ढिलाइ गरेको आरोप लगाउँदै अटोमोबाइल, काठ र औषधिजन्य उत्पादनहरूमा भन्सार वृद्धिको चेतावनी दिएका हुन्।
दक्षिण कोरियाको राष्ट्रपति कार्यालयले भने ट्रम्पको यस घोषणाबारे वासिङ्टनबाट हालसम्म कुनै आधिकारिक सूचना प्राप्त नभएको स्पष्ट पारेको छ। परिस्थितिको गम्भीरतालाई ध्यानमा राख्दै दक्षिण कोरियाले आजै एक अन्तर–एजेन्सी बैठक आयोजना गरी जवाफी रणनीतिका विषयमा छलफल गर्दैछ।
यसैबीच, क्यानडा भ्रमणमा रहेका दक्षिण कोरियाली व्यापार तथा उद्योग मन्त्री किम जुङ–क्वान अमेरिकी वाणिज्य सचिव हावर्ड लुटनिकसँग वार्ता गर्न चाँडै अमेरिका जाने तयारीमा छन्।
यसअघि भएको सम्झौताअनुसार दक्षिण कोरियाले अमेरिकामा ३५० अर्ब अमेरिकी डलर लगानी गर्ने प्रतिबद्धता जनाएपछि अमेरिकाले अटोमोबाइल लगायतका उत्पादनमा भन्सार घटाउन सहमति जनाएको थियो।
सोही बमोजिम नोभेम्बर २६ मा दक्षिण कोरियाली संसद्मा लगानी सम्बन्धी विधेयक पेस भएपछि अमेरिकाले डिसेम्बर ४ देखि भन्सार दर १५ प्रतिशतमा झारेको थियो। तर, ट्रम्पले अहिले सो विधेयक पारित गर्न भएको ढिलाइलाई लिएर पुनः पुरानै २५ प्रतिशतको दर कायम गर्ने धम्की दिएका हुन्।
