शान्तिपूर्ण मतदान जारी: कडा सुरक्षा र चुस्त व्यवस्थापनबीच मतदाताको उल्लास
हाम्रा कुरा
प्रकाशित २०८२ फागुन २१ बिहिबार
621
Shares
काठमाडौँ । प्रतिनिधिसभा सदस्य चयनका लागि आज भइरहेको निर्वाचनमा देशभरका मतदान केन्द्रहरूमा बिहानैदेखि मतदाताहरूको उत्साहजनक सहभागिता देखिएको छ। निर्वाचन आयोगका अनुसार मतदान प्रक्रिया देशभर शान्तिपूर्ण, व्यवस्थित र उल्लासमय वातावरणमा सञ्चालन भइरहेको छ।
मतदान केन्द्रहरूमा युवादेखि वृद्धवृद्धासम्मको उल्लेखनीय उपस्थिति रहेको छ। विशेषगरी ज्येष्ठ नागरिकहरूमा मतदानप्रतिको आकर्षण र उत्साह निकै लोभलाग्दो देखिएको छ। लौरो टेकेर र शारीरिक रूपमा अशक्त भए पनि आफ्नो मताधिकार प्रयोग गर्न मतदान केन्द्रसम्म पुगेका दृश्यहरूले निर्वाचनको गरिमा बढाएका छन्। मतदाताहरू मतदान केन्द्रमा राखिएको नामावलीमा आफ्नो नाम रुजु गर्न र विवरण खोज्न कर्मचारीहरूसँग उत्सुकतापूर्वक समन्वय गरिरहेका छन्।
निर्वाचनलाई निष्पक्ष र भयरहित बनाउन मतदान स्थलको सुरक्षा व्यवस्था अत्यन्तै कडा पारिएको छ। मतदान केन्द्रको प्रवेशद्वारमै नेपाल प्रहरीलगायतका सुरक्षाकर्मीहरूले विशेष सतर्कता अपनाएका छन्। सुरक्षाकर्मीहरूले मतदाताको परिचयपत्र (भोटर आईडी) सूक्ष्म रूपले जाँच गर्ने र सुरक्षाका लागि हाते मेटल डिटेक्टरसहित शारीरिक खानतलासी गरेर मात्र भित्र प्रवेश गर्न दिएका छन्।
मतदानलाई सहज बनाउन महिला र पुरुषका लागि छुट्टाछुट्टै लाइनको व्यवस्था गरिएको छ। डोरी टाँगेर बनाइएका यी लाइनहरूले भीडभाडलाई व्यवस्थित बनाएका छन्। यसका साथै, ड्युटीमा खटिएका सुरक्षाकर्मीहरूले सुरक्षा दिनुका अलावा ज्येष्ठ नागरिकहरूलाई डोर्याएर मतदान बुथसम्म पुग्न सहयोगीको भूमिका समेत निर्वाह गरिरहेका छन्, जुन दृश्य निकै प्रशंसनीय देखिएको छ।
