वीरगञ्ज । जिल्ला प्रहरी कार्यालय धनुषामा कार्यरत वरिष्ठ सई सागर राणा र तस्कर राजीव महासेठबीच भएको कुराकानीको अडियो लिक भएपछि प्रहरी प्रधान कार्यालयले मधेस प्रदेश कार्यालयबाट दुई जना सईलाई काठमाडौँ झिकाएको छ । 

प्रहरी प्रधान कार्यालयले सई गापाल थापा मगर र जयलाल यादवलाई काठमाडौँ झिकाएको हो । यस प्रकरणमा नेपाल प्रहरीको मधेस प्रदेशका प्रमुख डीआईजीको सिंहासन खतरामा परेको चर्चा व्याप्त भएपछि यस्ता क्षमतावान तस्कर कस्ता रहेछन् भन्ने खोजी बढिरहेको छ । 

जनकपुरका केही पत्रकार र संचारमाध्यमबाट प्राप्त जानकारी अनुसार नेपाल–भारत सीमा नजिक पर्ने दुहबी क्षेत्रमा राजीव महासेठ र उनको परिवारको नाम अस्वभाविक व्यापारिक गतिविधिको हुने गरेको छ। 

मूल रूपमा भारतीय सीमावर्ती क्षेत्र दुहबीकै बासिन्दा रहेका महासेठको उदय बिहारमा मदिरा प्रतिबन्ध भएपछिको समयमा तीव्र रूपमा भएको स्थानीय बताउँछन् । 

त्यसअघि आमासँगै अवैध रूपमा किराना सामानको ओसारपसारमा संलग्न उनी हाल मदिरा र कपडाको ठूलो सञ्जाल चलाउने व्यक्तिका रूपमा चिनिन्छन् । 

स्थानीय स्तरमा ‘हिरा चाची’ उपनामले परिचित उनकी आमाको प्रभाव यतिसम्म छ कि उनको नाम लिँदा मात्रै पनि सुरक्षाकर्मीले मालबाहक सवारीसाधनलाई सहजै छोडिदिन्छन् । आमाले किराना सामानको अवैध आयातलाई निरन्तरता दिइरहँदा राजीवले भने मदिरा र कपडाको अवैध कारोबारलाई आफ्नो पकडमा राखेको बुझिएको छ ।

स्थानीय प्रत्यक्षदर्शीहरूका अनुसार महासेठको गिरोहको सञ्जाल निकै फराकिलो र व्यवस्थित छ । उनले दैनिक १०० देखि १५० वटा मोटरसाइकल प्रयोग गरेर नेपालतर्फ किराना र कपडा भित्र्याउने तथा रातिको समयमा पिकअप भ्यानमार्फत भारततर्फ मदिरा पठाउने गरेको आरोप छ । 

यसै आर्जनबाट उनले सीमाको वारिपारि दुवैतर्फ सुविधासम्पन्न घरहरू बनाएका छन्, जसलाई  सामान भण्डारण गर्ने गोदामका रूपमा प्रयोग गरिन्छ । 

यसका अतिरिक्त उनले जनकपुरको देवीचोकमा एक भव्य महलसमेत निर्माण गरिसकेका छन् । लामो समयदेखि यति ठूलो परिमाणमा शङ्कास्पद गतिविधि भइरहँदा पनि नेपाल प्रहरी र सशस्त्र प्रहरी बलले उनलाई पक्राउ गर्नुको साटो मौन समर्थन जनाएर गोजी भर्ने गरेको र कहिलेकहीँ देखावटी रूपमा मात्रै छापा मार्ने गरेको गम्भीर आरोप स्थानीय बासिन्दाको छ। 

राजीव महासेठसँग भएको कुरा मिडियामा आएपछि वरिष्ठ सई सागर राणालाई मधेस प्रदेश प्रहरी कार्यालयले केन्द्रमा निलम्बनको सिफारिस गरेको छ । राजीव महासेठको फोन काण्डले गर्दा  तीन जना सई कारबाहीको भागेदार भएका छन् । 

राजीवनलाई अहिलेसम्म सोधपुछ अनुसन्धानको दायरामा ल्याउने काम भएको छैन । मुख्य नाकाहरूबाट रू सय भन्दा बढीको समान ल्याएको नागरिकलाई जनावरको जस्तो ब्यवहार गरिँदै छ भने सेटिङमा चल्ने तस्करी धन्धालाई प्रहरीले सलाम ठोक्ने गरेको छ । 

तस्कर महासेठले आफ्ना आसेपासेलाई पुराना पार्टीहरूले देश बिगारेको भन्दै घण्टीलाई गत चुनावमा सहयोग गरेर रास्वपालाई जिताएको गौरव गाथा सुनाउने गरेका छन् ।