देशभर ४२२ विपद्का घटना: आगलागी र डढेलोको उच्च जोखिम
हाम्रा कुरा
प्रकाशित २०८३ वैशाख १३ आइतबार
326
Shares
काठमाडौँ । राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्याङ्कअनुसार वैशाख महिनाको सुरुवाती १२ दिनमै देशभर विपद्का ४२२ वटा घटना भएका छन्।
वैशाख १ देखि १२ गतेसम्मको अवधिमा घटेका यी विभिन्न प्राकृतिक तथा अन्य विपद्मा परेर २३ जनाले ज्यान गुमाएका छन् भने ७३ जना घाइते भएका छन्। यस अवधिमा विशेषगरी सुख्खा मौसमका कारण आगलागी र डढेलोका घटनाहरू उल्लेख्य रूपमा वृद्धि भएको देखिएको छ, जसमा २१७ वटा आगलागी र ११४ वटा डढेलोका घटना दर्ता भएका छन्।
यसका साथै सोही अवधिमा २९ वटा हुरीबतास, १४ वटा चट्याङ र १६ वटा जनावरको आक्रमणका घटनाहरू भएका छन् भने सर्पदंशका २० र लेक लागेका ३ वटा घटना रेकर्ड गरिएका छन्। बाढी, पहिरो, भारी वर्षा र असिनाका समान दुई–दुईवटा घटनाहरूका साथै एउटा डुङ्गा पल्टिएको घटना पनि भएको छ।
तथ्याङ्कअनुसार वैशाख ११ गते बिहानदेखि १२ गते बिहानसम्मको २४ घण्टामा मात्रै ३२ वटा विपद्का घटनाहरू भएका छन् जसबाट कुल २७ जिल्ला प्रभावित भएका छन्। समग्रमा यो छोटो अवधिमा ५२७ वटा विपद्जन्य परिस्थितिहरू सिर्जना भएको र यसले मानवीयसँगै भौतिक क्षति समेत पुर्याएको प्राधिकरणले जनाएको छ।
