खेलकुद क्षेत्रलाई सम्मान दिन नसकेको मन्त्री पोखरेलको स्वीकारोक्ति [भिडियो]
हाम्रा कुरा
प्रकाशित २०८३ जेठ ७ बिहिबार
827
Shares
काठमाडौँ। शिक्षा तथा खेलकुद मन्त्री सस्मित पोखरेलले साफ महिला च्याम्पियनसिप खेल्न भारत प्रस्थान गर्न लागेको नेपाली राष्ट्रिय महिला टोलीलाई बिदाइ गर्दै खेलकुद क्षेत्रमा राज्यले अझै पर्याप्त काम गर्न नसकेको स्वीकार गरेका छन् ।
बिहीबार आयोजित बिदाइ कार्यक्रममा बोल्दै मन्त्री पोखरेलले आत्मआलोचनासहित राज्यका तर्फबाट खेलकुद क्षेत्रलाई आवश्यक सम्मान र सुविधा दिन नसकिएको बताएका हुन् ।
उनले सीमित स्रोत र साधनका बाबजुद खेलकुद क्षेत्रको विकास र खेलाडीको सम्मान बढाउने प्रयास जारी रहने प्रतिबद्धता व्यक्त गरे ।
उनले भने, ‘राज्यले आत्मआलोचनाबाट जति खेलाडीहरूको लागि गर्नुपर्ने हो त्यति गर्न सकेको छैन । खेलकुद क्षेत्रलाई जति सम्मान दिनुपर्ने हो त्यति दिन सकेका छैनौँ । हाम्रो सीमित स्रोत र साधनलाई प्रयोग गरेर खेलकुद क्षेत्रलाई कसरी विकास गर्न सकिन्छ र खेलाडीलाई कसरी सम्मान गर्न सकिन्छ भन्नेमा हामी प्रयत्नशील छौं ।’
मन्त्री पोखरेलले नेपाली खेलाडीहरूले देशको प्रतिनिधित्व गर्दै राष्ट्रिय झण्डालाई गर्वका साथ उचालिरहेको उल्लेख गर्दै धन्यवाद पनि व्यक्त गरे ।
प्रतियोगिताबारे आशावादी देखिएका उनले नेपालले राम्रो प्रदर्शन गर्ने विश्वास व्यक्त गर्दै भने, ‘अब खेल हो, जे पनि हुन सक्छ । जित्नै पर्छ भन्ने छैन, तर हाम्रो आत्मविश्वास बलियो छ, त्यसैले नेपालले यो खेल जित्ने विश्वास छ ।’
यसैगरी उनले खेलकुद क्षेत्रको विकासमा लगानी बढाउनेतर्फ सरकार प्रयत्नशील रहेको पनि बताए ।
