नेतान्याहूलाई ट्रम्पले रोके, गरे हिजबुल्लाहसँग युद्धविरामको घोषणा
हाम्रा कुरा
प्रकाशित २०८३ जेठ २० बुधबार
2.4k
Shares
काठमाडौँ । अमेरिकी राष्ट्रपति डोनाल्ड ट्रम्पले इजरायल र हिजबुल्लाहबिच युद्धविरामका लागि सहमति भएको घोषणा गरेका छन्। सामाजिक सञ्जालमार्फत यसको जानकारी दिँदै राष्ट्रपति ट्रम्पले यस क्षेत्रमा शान्ति स्थापनाका लागि इरानसँगको वार्ता समेत तीव्र गतिमा अगाडि बढिरहेको दाबी गरेका हुन्।
लेबनानमा इजरायली सैन्य कारबाहीको विरोध गर्दै तेहरान (इरान) ले मध्यस्थकर्ताहरूमार्फत वासिङ्टनसँग भइरहेको सन्देश आदानप्रदान प्रक्रिया स्थगित गरेको बताएको केही घण्टापछि नै ट्रम्पको यो सकारात्मक टिप्पणी सार्वजनिक भएको हो। आफ्नो सामाजिक सञ्जाल 'ट्रुथ सोसल' मा लेख्दै ट्रम्पले भनेका छन्, “इरानसँगको वार्ता तीव्र गतिमा जारी छ।”
राष्ट्रपति ट्रम्पले इजरायली प्रधानमन्त्री बेन्जामिन नेतान्याहूसँग फोन वार्ता भएको र हिजबुल्लाहका प्रतिनिधिहरूले पनि सकारात्मक सन्देश पठाएको उल्लेख गर्दै दुवै पक्ष शत्रुतापूर्ण सैन्य गतिविधि रोक्न सहमत भएको बताएका हुन्। इजरायली प्रधानमन्त्री नेतान्याहूसँगको संवाद अत्यन्तै फलदायी रहेको उल्लेख गर्दै ट्रम्पले युद्धविरामको सहमति अनुसार इजरायलले लेबनानको राजधानी बेरुतमा आफ्नो सेना नपठाउने समेत स्पष्ट पारेका छन्।
यसअघि आइतबार मात्र इजरायलले दक्षिण लेबनानको रणनीतिक महत्त्वको ब्युफोर्ट रिज र त्यसको टाकुरामा रहेको ऐतिहासिक किल्ला कब्जा गरेको दाबी गरेको थियो। यो क्षेत्र यसअघि युद्धविराम सम्झौतापछि इजरायलले कायम राखेको सुरक्षा क्षेत्र भन्दा बाहिर पर्दछ।
सञ्चारमाध्यमहरूका अनुसार यो कदम २० वर्षभन्दा बढीको अवधिमा लेबनानमा इजरायलको सबैभन्दा गहिरो सैन्य प्रवेश हो। इजरायलको यस आक्रामक कदमको अरब राष्ट्रहरूका साथै फ्रान्स, जर्मनी र संयुक्त अधिराज्य (यूके) लगायतका पश्चिमा शक्तिहरूले समेत कडा निन्दा गरेका थिए। अन्तर्राष्ट्रिय दबाब र चर्को विरोधबिच राष्ट्रपति ट्रम्पको मध्यस्थतामा यो नयाँ युद्धविरामको घोषणा बाहिर आएको हो।
