ललितपुर । नेपाल र दक्षिण कोरियाबीचको श्रम सहयोगलाई थप सुदृढ बनाउने उद्देश्यका साथ ‘नेपाल-कोरिया श्रम सहयोग गोष्ठी’ आज सम्पन्न भएको छ ।

नेपालका लागि कोरियाली दूतावास र रोजगार अनुमति प्रणाली केन्द्र (ईपीएस सेन्टर)को सहकार्यमा युवा, श्रम तथा रोजगार मन्त्रालयद्वारा आयोजित उक्त कार्यक्रममा वैदेशिक रोजगारीबाट प्राप्त सीप र पुँजीलाई नेपालको आर्थिक रूपान्तरणमा लगाउनुपर्नेमा जोड दिइएको हो ।

कार्यक्रमलाई सम्बोधन गर्दै युवा, श्रम तथा रोजगारमन्त्री रामजी यादवले ईपीएस कार्यक्रमले वित्तीय विप्रेषण मात्र नभई सामाजिक विप्रेषणसमेत सिर्जना गरिरहेको बताए । "कोरियाबाट फर्केका नेपालीले सीप, अनुशासन, आत्मविश्वास र व्यावसायिक अनुभव लिएर आउनुहुन्छ । यही अनुभवले उहाँहरूलाई रोजगारी खोज्नेबाट रोजगारदातामा रूपान्तरण गर्न मद्दत पुर्‍याएको छ”, उनले भने ।

विदेशबाट फर्किएर स्वदेशमा उद्यम गरिरहेका सात जना सफल उद्यमीलाई मन्त्रालयले हालै सम्मान गरेका जनाउँदै तीमध्ये दुई जना दक्षिण कोरियाबाट फर्किएका हुनु यसको सफल उदाहरण रहेको मन्त्री यादवले उल्लेख गरे । दक्षिण कोरियाको विकास यात्राको उदाहरण दिँदै उनले कुनै समय कोरियाका नागरिक कामको खोजीमा अन्यत्र जाने गरेका स्मरण गरे ।

“कोरियाको यात्राले नेपालका लागि एउटा महत्त्वपूर्ण सन्देश दिन्छ, कुनै पनि देश श्रमिक पठाउने मुलुकबाट सुरु भएर आफ्नै देशमा आकर्षक अवसर सिर्जना गर्ने राष्ट्रमा रूपान्तरण हुन सक्छ”, मन्त्री यादवले भने । यसका लागि आप्रवासनलाई सीप, बचत, लगानी र उद्यमशीलतामा बदल्ने स्पष्ट राष्ट्रिय दृष्टिकोण र नीति आवश्यक रहेको उनको तर्क छ ।

ईपीएस परीक्षा ढाँचा (ईपीएस मोडल) लाई अन्तरराष्ट्रिय श्रम आप्रवासनका लागि एउटा उदाहरणीय ढाँचा रहेको मान्दै मन्त्री यादवले यसमा अवलम्बन गरिने पारदर्शी छनोट प्रक्रिया र डिजिटल प्रणालीको प्रशंसा गरे । सरकारले वैदेशिक रोजगारीलाई थप सुरक्षित, मर्यादित र व्यवस्थित बनाउन महत्त्वपूर्ण सुधार गरिरहेको भन्दै उनले यसमा ईपीएस परीक्षा ढाँचामा अवलम्बन गरिने सकारात्मक मार्गबाट धेरै कुरा सिक्न सकिने बताए ।

मन्त्री यादवले दुवै सरकारलाई ईपीएस आकाङ्क्षीहरूलाई स्पष्ट र भरपर्दो सूचना उपलब्ध गराउन र कार्यस्थलको सुरक्षा तथा कामदारको मानसिक स्वास्थ्यमा ध्यान दिन अनुरोध गरे । साथै, कोरियाबाट फर्केका र फर्कने तयारीमा रहेका कामदारका लागि सञ्चालित पुनःएकीकरण कार्यक्रममा थप सहकार्य गर्न दक्षिण कोरियाली सरकारलाई उनले आग्रह गरे ।

कार्यक्रममा नेपालका लागि दक्षिण कोरियाली राजदूत, नेपालका लागि मलेसियाका राजदूत, विभिन्न कूटनीतिक नियोगका प्रतिनिधिहरू, सरकारी अधिकारीहरू र ईपीएसमार्फत कोरिया पुगर स्वदेश फर्केका नेपालीहरूको उपस्थिति थियो ।