काठमाडौँ। नेकपा एमालेकी नेतृ तथा अनेरास्ववियुकी पूर्वअध्यक्ष नवीना लामाले पार्टी रुपान्तरणमा विद्यार्थी नेता एवं संगठनका पूर्वनेताहरूको भूमिका महत्वपूर्ण रहेको बताएकी छन् ।

पार्टी रुपान्तरणमा पूर्वअखिलको भूमिका विषयक कार्यक्रममा बोल्दै लामाले नेपाललाई विदेशी शक्तिहरूले गिद्धे नजरले हेर्ने गरेको दाबी गरिन् ।

उनले पूर्व र पश्चिमतर्फका शक्तिहरूले नेकपा एमालेले अघि सारेको कम्युनिष्ट आन्दोलनको नेतृत्वदायी भूमिकालाई मन नपराएको बताउँदै त्यसलाई चिर्नुपर्ने आवश्यकता रहेको उल्लेख गरिन् ।

उनले भनिन्, ‘देशविदेशी शक्तिहरूले नेपाललाई गिद्धे नजरले हेरेको छ। पूर्व र पश्चिमतिरबाट एमालेलाई र कम्युनिष्ट पार्टीको अगुवा गर्ने एमाले हो भन्ने कुरालाई मन परिरहेको छैन। त्यसकारण यो कुरालाई चिर्नुपर्ने छ। हाम्रो पार्टीले गरेको विकास र समृद्धिको कुरा र पार्टीका अध्यक्षले लिएका राष्ट्रियताका एजेण्डाहरू कमजोर थिएनन्। तर कमजोर नहुँदा पनि आफ्नो कार्यदिशामा असफल भएको कुरा, नेतृत्वमा कमी भएको कुरा निकालिँदै आएका छन्। समय अनुसार जबज र समय अनुसारको मार्क्सवाद, समय अनुसारको नेतृत्व युवाले गर्छ । अनेरास्ववियुको पूर्व अध्यक्षहरूबाटै हुन्छ।’ 

उनले एमालेले अघि सारेका विकास, समृद्धि र राष्ट्रियताका एजेण्डाहरू कमजोर नरहेको दाबी गर्दै पार्टीको कार्यदिशा कार्यान्वयन र नेतृत्वमा देखिएका कमजोरीबारे आत्मसमीक्षा गर्नुपर्ने बताइन् ।

लामाले समयअनुसार जनताको बहुदलीय जनवाद (जबज), मार्क्सवाद र नेतृत्व शैलीलाई परिमार्जन गर्दै अघि बढ्नुपर्ने धारणा राखिन्।

उनले अबको नेतृत्व युवाबाट, विशेषगरी अनेरास्ववियुका पूर्व अध्यक्षहरूमध्येबाट समेत आउन सक्ने बताइन्।

उनले पछिल्लो समय धेरै युवा विदेशिन बाध्य भएको र पार्टीमा काम गर्ने इच्छा हुँदाहुँदै पनि निराश भएर टाढिनुपर्ने अवस्था आएको बताइन्।

पार्टीभित्र पहुँच र गुटको आधारमा अवसर पाउने प्रवृत्ति बढेको भन्दै उनले त्यसलाई सुधार गर्नुपर्ने धारणा राखिन्।

उनले नेकपा एमाले लोकतन्त्रको हितमा अघि बढ्ने पार्टीका रूपमा स्थापित हुनुपर्नेमा जोड दिइन्।