सरकारका पूर्व सचिव किशोर थापा काठमाडौं महानगरको मेयरमा उठ्दै

साझा पार्टीको स्वतन्त्र उम्मेद्वार

प्रकाशित मिति : २०७४ बैशाख १ शुक्रबार

काठमाडौं । रविन्द्र मिश्र नेतृत्वको साझा पार्टीमा आवद्ध पूर्वसचिव किशोर थापाले काठमाडौं महानगरपालिकाको मेयरमा उम्मेदवारी दिने घोषणा गरेका छन् ।

साझा पार्टीको केन्द्रीय संयोजन समिति सदस्य र नेपाल सरकारको पूर्व सचिव रहेका थापा बागमती सफाइ अभियानका अभियन्ता पनि हुन् । प्रशासनिक क्षेत्रमा लामो अनुभव भएका थापा सहरी विकास मन्त्री हुँदा बागमती सफाइ अभियानका कारण चर्चामा थिए ।

निर्वाचन आयोगमा दल दर्ता नभएकाले साझा पार्टीले स्थानीय तहको चुनावमा थापालाई दलगत रुपमा उम्मेद्वार बनाउन पाउने छैन । थापा स्वतन्त्र उम्मेदवारका रुपमा मेयरमा उठ्ने छन् । साझा पार्टीले एक विज्ञप्ति जारी गरी थापा काठमाडौं महानगरको मेयरमा उठ्न लागेको जानकारी दिएको हो ।
 

किशोर थापा को हुन् ?
काठमाडौंको मेयरमा उम्मेदवारी दिने घोषणा गरेका थापा आर्किटेक्ट इन्जिनियर हुन् ।  थापाले शहरी विकास, शिक्षा र पर्यटन तथा नागरिक उड्डयन जस्ता महत्वपूर्ण मन्त्रालयहरूमा सचिवको जिम्मेवारी सम्हाले । योजना निर्माण र कार्यान्वयनका हकमा निकै अनुभवि मानिन्छन् । थापाले शहरी योजनामा स्नातकोत्तर गरेका छन् भने, आवास नीतिका विज्ञ हुन् ।

काठमाडौंको सडक विस्तार गर्ने तथा दशकौंदेखि अवरूद्ध रहेको मेलम्ची खानेपानी आयोजनालाई तीव्रता दिने, नेपालको २० वर्षे ऊर्जा विकास योजना तथा बाहिरी चक्रपथलगायत आयोजनाको नेतृत्व गर्ने कार्यमा थापा सक्रिय रहे । सहरी विकासमा हुँदा बागमती सफाइ अभियानमा जोडिएका थापा अवकास पाएपछि पनि सक्रिय भए । थापा २०३१ सालको एसएलसी बोर्ड टपर हुन् ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ