वासिङटन। अमेरिकी राष्ट्रपति डोनाल्ड ट्रम्पले आइतबार चीन र जापानका नेताहरुसँग फोनवार्ता गर्ने छन्। उनले आइतबार गर्न लागेको फोनवार्ताको विषय हालैका दिनमा उत्तर कोरियाले जारी राखेको आणविक परीक्षणका साथै सो परीक्षणका कारण कोरियाली प्रायद्वीपमा जारी अशान्ति रहने छ।

अमेरिकी राष्ट्रपतिको कार्यालय ह्वाइट हाउसले सो विषयमा आज जानकारी दिएको छ। उनले चीनसँग विशेषगरी उत्तर कोरियाका विषयमा नै फोनमा कुराकानी गर्ने बताइएको छ।

उत्तर कोरियाको एक अन्तर्राष्ट्रिय सहयोगीका रुपमा चीन रहेकोले उसका कारण सो वार्ताबाट कोरियाली प्रायद्वीपमा शान्ति र स्थिरताका लागि सहयोग पुग्न सक्ने अनुमान गरिएको अमेरिकी भनाई रहेको छ।

अमेरिकी राष्ट्रपति ट्रम्पले चिनियाँ राष्ट्रपति सि चिनफिङ र जापानी प्रधानमन्त्री सिन्जो आबेसँग फोनवार्ता गरे बनइएको छ।

अमेरिकी समयअनुसार आइतबार साँझ ८ बजे उनले जापनी प्रधानमन्त्री आबे र ८:४५ मा चिनियाँ राष्ट्रपति चिनफिङसँग वार्ता गर्नुहुने ह्वाइटहाउसद्वारा प्रकाशित विज्ञप्तिमा जानकारी दिइएको छ।

उता दक्षिण कोरियाली राष्ट्रपति मुन जाय इनले आफ्नो अमेरिका भ्रमणका समयमा आफूले उत्तर कोरियाका कारण कोरियाली प्रायद्वीपमा जारी रहेको अशान्तिको अवस्था हटाउन निशस्त्रीकरणका विषयमा वार्ता गरेको बताएका थिए।

उनले यसै हप्ता कोरियाको भ्रमण गरेका छन्। कोरियाली प्रायद्वीपमा क्षेत्रीय शान्ति र स्थायित्वका लागि आफूले अमेरिकी राष्ट्रपति ट्रम्पसँग आपसी परामर्श एवम् वार्ता गरेको र वार्ताले आपसी हित र द्विपक्षीय सम्बन्ध सुदृढिकरणमा सहयोग पुर्‍याएको उनको धारणा थियो।

उत्तर कोरियाले पछिल्लो केही समययता दक्षिणको आग्रहका विरुद्ध आणविक परीक्षणलाई जारी राखेको छ। साथै दक्षिण कोरियाको विरोधका अभिव्यक्तिहरु उत्तर कोरियाले आक्रामक रुपमा दिने गरेको छ।

उत्तर कोरियाले बारम्बार गर्ने गरेको यस्तो आणविक परीक्षणले अन्तर्राष्ट्रिय सुरक्षा मापदण्डका साथै प्रचलित कानुनको उल्लङ्घन गरेको प्रतिक्रिया दक्षिण कोरियाको छ।

अमेरिकी रक्षामन्त्री जिम म्याटिसले केही दिनअघि दिनुभएको सार्वजनिक अभिव्यक्तिमा उत्तर कोरियाको कदम कोरियाली प्रायद्वीपका लागि मात्र नभएर विश्वकै लागि पनि शान्ति भंग गर्ने खतरा हो भनेका थिए।

आफू राष्ट्रपतिमा निर्वाचित भए लगत्तै अमेरिकी राष्ट्रपति ट्रम्पले पनि उत्तर कोरियाको हतियार कार्यक्रम आफ्नो विदेश नीतिको प्राथमिकतामा रहने धारणा राखेका थिए।

सोही बमोजिम नै पछिल्ला महिनाहरुमा उहाँले अमेरिकी सरकारको विदेश नीति विशेषगरी उत्तर कोरियाको लागि कस्तो हुने भन्ने बारेमा पनि समय समयमा छलफल एवम् परामर्श गरेका छन्।

केही दिनमात्र अघि पनि उत्तर कोरियाले अमेरिकाका विरुद्धमा राजधानी प्योङयाङ्मा जुलुस प्रदर्शन गरी अमेरिकाको कडा आलोचना गरेपछि राष्ट्रपति ट्रम्पले उत्तर कोरियाको बारेमा निकै चासो लिनुभएको अन्तर्राष्ट्रिय समाचार एजेन्सीहरुले जनाएका छन्।

विश्व समुदाय र संयुक्त राष्ट्रसंघले समेत हतियारको होडबाजीका रुपमा आणविक परीक्षणजस्ता क्रियाकलापहरु गरेर परिस्थितिलाई उत्तेजक बनाउने काम नगर्न गरिएका बारम्बारका अनुरोधहरुका बाबजुद पनि उत्तर कोरियाले भने आणविक परीक्षणलाई निरन्तरता दिँदै आएको छ। रासस÷एएफपी