दुर्घटनामा परी भारतमा नौ र चीनमा एघार जनाको मृत्यु

प्रकाशित २०७४ साउन ७ शनिबार

नयाँदिल्ली । चीन, ७ साउन । भारत र चीनमा भएका छुट्टाछुट्टै सडक दुर्घटनामा परी कम्तीमा २० जनाको मृत्यु भएको छ ।

दवै घटनामा परी कम्तीमा ३१ जना घाइते भएको अधिकारीलाई उद्धृत गर्दै सिन्ह्वाले जनाएको छ ।

भारतको राजस्थान राज्यमा शनिबार भएको बस दुर्घटनामा कम्तीमा नौ जनाको मृत्यु भएको छ भने अरु २२ जना घाइते भएका छन् ।

उदयपुर सहरको नेहला गाउँ नजिकै बसका चालकले नियन्त्रण गुमाउँदा दुर्घटना भएको प्रहरीले जनाएको छ ।

मृत्यु भएका नौ जनामध्ये छ जना महिलाको घटनास्थलमै ज्यान गएको थियो । अन्य घाइतेलाई उपचारका लागि नजिकैको स्थानीय सरकारी अस्पतालमा भर्ना गरिएको छ ।

उपचार गराइरहेका मध्ये केहीको अवस्था गम्भीर रहेको अस्पतालका अधिकारीहरुले जानकारी दिएका छन् ।

त्यसैगरी चीनको हेबेई प्रान्तमा शुक्रबार भएको सडक दुर्घटनामा परी कम्तीमा ११ जनाको मृत्यु भएको छ भने अरु नौ जना घाइते भएका छन् ।

स्थानीय प्रहरी अधिकारीले शनिबार दिएको जानकारीअनुसार, मृतकमध्ये आठ जनाको घटनास्थलमै र अन्य तीन जनाको अस्पताल मृत्यु भएको हो ।

राष्ट्रिय राजमार्गमा पर्ने हऔंगमेइ टाउनसिपमा भएको दुर्घटनामा घाइते भएका सात वर्षदेखि ७० वर्षसम्म रहेको प्रहरीले जनाएको छ । तीमध्ये एक जनाको अवस्था जटिल रहेको अस्पतालको भनाइ छ ।

दुर्घटनाको कारण स्पष्ट भइनसकेकाले प्रहरीले अनुसन्धान भइरहेको बताएको छ ।सिन्ह्वा