काँग्रेसका नेत्रीहरु पार्टी नेतृत्वमाथि खनिए, कारण गहिरो
प्रकाशित २०७४ भदौ १३ मंगलबार
347
Shares
काठमाडौँ । नेपाली काँग्रेसका नेत्रीहरुले पार्टीले महिलालाई उपेक्षा गरेको बताएका छन् ।
नेपाल विद्यार्थी संघ केन्द्रीय समितिले मंगलबार यहाँ आयोजना गरेको ‘वर्तमान राजनीतिक संरचनामा महिला प्रतिनिधित्वको भूमिका र चुनौती’ विषयको कार्यक्रममा नेत्रीहरुले पार्टीले महिलालाई उल्लेख सहभागिता गराउन नसकेको बताएका हुन् ।
काँग्रेस केन्द्रीय सदस्य महालक्ष्मी उपाध्यायले महिलाले काँग्रेस पार्टीमा बसेर राजनीति गर्न गाह्रो हुने अवस्था आएको बताइन् । “अरू पार्टीले सर्वोच्च पदमा महिलालाई प्रतिनिधित्व गराएका छन् तर काँग्रेसले महिलालाई केही गर्न सकेको छैन,” नेत्री उपाध्यायले भनिन् ।
काँग्रेस केन्द्रीय सदस्य एवं कृषि विकास राज्यमन्त्री सरिता प्रसाईंले महिलाको अधिकार संविधानले ३३ प्रतिशत तोके पनि कुनै पनि स्थानमा त्यति पुग्न नसकेको बताइन् ।
काठमाडौँ महानगरपालिका उपप्रमुख हरिप्रभा खड्गीले काँग्रेसकै सरकारले मन्त्रिपरिषदमा एक जना मात्र महिलालाई लगेर उपेक्षा गरेको बताइन् ।
नेविसंघकी कावा अध्यक्ष उर्मिला थपलियाले महिला पुरुषसरह सक्षम हुँदाहुँदै पनि अवसर पाउन नसकेको गुनासो गरिन् ।
कार्यक्रममा नेविसङ्घले स्थानीय तहको निर्वाचनमा विजयी महिलालाई सम्मान गरेको थियो । सम्मानित हुनेमा कामपा उपप्रमुख खड्गी, मध्यपुरथिमि नगरपालिका उपप्रमुख अञ्जना मधुकर्मी, पञ्चदेवल नगरपालिका अछामका उपप्रमुख अम्बिका चलाउने र सुनकोशी गाउँपालिका सिन्धुपाल्चोकका उपाध्यक्ष लक्ष्मी पौडेल रहेका छन् । रासस
