गोरखाका नयाँ शक्तिका दुई दर्जन नेताहरु बाबुराम छाडेर माओवादीतिर
प्रकाशित २०७४ कार्तिक ९ बिहिबार
216
Shares
काठमाडौं । गोरखा जिल्लामा क्रियाशील नयाँ शक्ति पार्टी नेपालका दुई दर्जन नेताहरु नेकपा माओवादी केन्द्रमा प्रवेश गरेका छन् ।
नयाँ शक्तिका नेताहरु संयोजक बाबुराम भट्टराईलाई छाडेर बिहीबार बिहान माओवादी केन्द्रका अध्यक्ष पुष्पकमल दाहाल प्रचण्डको हातबाट टिका लगाएर माओवादी केन्द्रमा प्रवेश गरेका हुन् ।
माओवादी केन्द्रमा प्रवेश गर्ने नेताहरुमा नयाँ शक्ति पार्टीका केन्द्रीय परिषद् सदस्य जीतबहादुर घले, तमु परिषद्का केन्द्रीय सह–ईन्चार्ज आनन्दबहादुर घले, गाउँपालिका संयोजक डम्वरसिंह घले, गाउँ परिषद् सल्लाहकारद्वय डा जीतबहादुर घले, बलबहादुर घले, बाम बुद्धिजीवी खड्कबहादुर गुरुङ लगायत रहेका छन् ।
पार्टी प्रवेश गराउँदै माओवादी केन्द्रका अध्यक्ष प्रचण्डले गोरखा जिल्ला बामपन्थीहरुको किल्ला भएको बताए ।
अध्यक्ष प्रचण्डले भने, ‘गोरखा जिल्ला बामपन्थीहरुको किल्ला हो । गोरखा जिल्लाको राजनीतिक सङ्घर्ष जहिले पनि कम्युनिष्ट र कांग्रेसका बीचमा नै रह्यो ।
जनयुद्धदेखि सम्पूर्ण राजनीतिक र सामाजिक आन्दोलनमा गोरखा जहिले पनि अग्रगमन र प्रगतिको पक्षमा उभिएको छ । तपाईहरुको पार्टी प्रवेशले गोरखामा प्रतिगामी शक्ति र प्रवृत्ति परास्त हुने र अग्रगामी सोंच र विचारले जित्ने मैले विश्वास लिएको छु ।’
माओवादी केन्द्र प्रवेश गर्ने नयाँ शक्तिका गोरखाली नेताहरुले साना पार्टी र समूहबाट नेपालको आर्थिक समृद्धि सम्भव नभएको र नेपालमा एउटै कम्युनिष्ट केन्द्र बनाएर मात्र समाजवादमा जान सकिने निष्कर्षसहित आफूहरु माओवादी केन्द्रमा आएको बताए ।
पार्टी प्रवेश कार्यक्रममा माओवादी केन्द्रका नेता एवं गोरखा क्षेत्र नं–२ का उम्मेद्वार नारायणकाजी श्रेष्ठ, क्षेत्र नं–१ का उम्मेद्वार हरिराज अधिकारी लगायतका नेताहरु उपस्थित थिए ।
