- सुन चाँदी दर
- विनिमय दर
- नेपाली पात्रो
- राशिफल
काठमाडौं । बिहिबार हुने प्रतिनिधि र प्रदेश सभाको दोस्रो चरणको निर्वाचनमा पनि केही त्यस्ता अभागी उम्मेदवार छन् जो आफूले आफैलाई मतदान गर्न पाउने छैनन् । तीमध्ये चर्चित अनुहारका नेता हुन् नेकपा एमालेका अध्यक्ष केपी ओली ।
ओली झापा ५ बाट प्रतिनिधिसभा उम्मेदवार उठेका छन् । तर उनी भक्तपुर सुर्यविनायक नगरपालिकाका मतदाता हुन् ।
स्थानीय तहको निर्वाचनमा ओलीले भक्तपुरबाटै मतदान गरेका थिए । यसपटक भक्तपुरमा उनका सुरक्षा कवजका रुपमा देखिएका युथ फोर्सका समेत कमाण्डर रहेका महेश बस्नेत उठेका छन् ।
एमालेका वरिष्ठ नेता माधवकुमार नेपालले पनि आफूले आफैलाई मतदान गर्न पाउने छैनन् । काठमाडौं क्षेत्र नम्बर २ बाट उम्मेदवार बनेका नेपालको मतदाता नामावली रौतहटमा छ । उनले पनि स्थानीय तहको निर्वाचनमा रौतहटबाट मतदान गरेका थिए ।
नेपालले आफू चार दशकदेखि काठमाडौंको यही क्षेत्रमै बस्दै आएकाले ‘म लोकल हुँ टुरिष्ट हैन’ भन्दै आएका छन् । तर ‘मतदाता नामावली नै नसारेपछि के को लोकल ? घर हुँदैमा हुन्छ ?’भनी आक्रोशसमेत पोख्ने एमालेकै कार्यकर्ताहरु छन् ।
माओवादी केन्द्रका नेताहरु पनि टुरिष्ट उम्मेदवारकै रुपमा लाखापाखा भएका छन् । आफूले आफूलाई मत दिन नपाउनेमा कृष्णबहादुर महरा, सुरेन्द्र कार्की र झक्कुप्रसाद सुवेदी पनि छन् ।
महरा दाङ–२बाट प्रतिनिधिसभा उम्मेदवार छन् । महरा रोल्पा लिवाङ नगरपालिका–१ तारा मावि केन्द्रका मतदाता हुन् ।
उनले मंसिर १० को निर्वाचनमा भाग लिन रोल्पा नै पुगेनन् ।
यस्तै झापा–१बाट उम्मेदवार बनेका कार्की काठमाडौंका मतदाता हुन् ।
०६४ को पहिलो संविधानसभा निर्वाचनमा काठमाडौं २ बाट माधवकुमार नेपाललाई हराएर सनसनी मच्याएका झक्कुप्रसाद सुवेदी पनि यसपटक अझ बढी टुरिष्ट बनेका छन् । उनी काठमाडौं ६ का उम्मेदवार हुन् । सुवेदी रोल्पाका मतदाता हुन् ।
राजपा अध्यक्ष मण्डलका नेता महन्थ ठाकुरदे िराजेन्द्र महतोले पनि आफूलाई भोट दिन पाउने छैनन् ।
सर्लाहीका मतदाता ठाकुर महोत्तरी–३ का उम्मेदवार हुन् । सर्लाहीकै मतदाता महतो धनुषा ३ का उम्मेदवार हुन् ।
संघीय समाजवादी फोरमका अध्यक्ष उपेन्द्र यादव पनि मोरङका मतदाता हुन् तर उनी सप्तरी २ का उम्मेदवार हुन् ।
काँग्रेसबाट पनि आफूलाई मत हाल्न नपाउने उम्मेदवार छन् । आरजु राणा देउवा कैलाली ५ बाट उम्मेदवार बनेकी छिन् तर उनको मतदाता नामावली डडेल्धुरामा छ ।
भक्तपुर २ का कांग्रेस उम्मेदवार दमननाथ ढुंगाना काठमाडौं २ का मतदाता हुन् । मोरङ–२ का कांग्रेस उम्मेदवार डा मीनेन्द्र रिजाल मोरङ ४ का मतदाता हुन् ।
केही उम्मेदवार अझै छन् जसले आफूले आफैलाई मतदान गर्न पाउने छैनन् ।
विवेकशिल साझा पार्टीका कतिपय उम्मेदवारसमेत आफूले आफैलाई मतदान गर्न पाउने छैनन् ।