-
-
-
-
काठमाडौं । उत्तर कोरियाली शासक किम जोङ उनले दक्षिण कोरियासँग इतिहास कोर्न आतुर रहेको बताएका छन् ।
दक्षिण कोरियाका प्रतिनिधिसँग प्योङयाङमा कुराकानी गर्दै किमले नजिकको सम्बन्ध स्थापना गर्ने सन्दर्भमा इतिहास कोर्न आतुर रहेको बताएका हुन् ।
उत्तर कोरियाको समाचार संस्था केसीएनएका अनुसार किम दक्षिण कोरियाप्रति निकै सकारात्मक देखिएका छन् ।
दक्षिण कोरियाली १० सदस्यीय प्रतिनिधि मण्डल उत्तर कोरियामा छ । टोलीमा दुई जना मन्त्रीसहित गुप्तचर प्रमुख, राष्ट्रिय सुरक्षा सल्लाहाकार लगायत छन् ।
पहिलो पटक किमले खुलेर कुरा गरेको केसीएनएले जनाएको छ । दक्षिण कोरिया अमेरिकी सहयोगमा चलेको भन्दै किमले यसअघि नराम्रो व्यवहार गर्दै आएका थिए ।
गत महिना दक्षिण कोरियामा आयोजित विन्टर ओलम्पिकपछि दुई कोरियाको सम्बन्ध सुमधुर बन्दै गएको छ ।
ओलम्पिकमा मिलेर एउटै टिमसमेत बनेको थियो । दक्षिण र उत्तर कोरियाको यो सौहार्दताले विश्वलाई भने चकित नै पारेको छ ।
किमले दक्षिण कोरियाली टिमसंग डिनरसमेत गरेका छन् ।
