क्यानबेरा ।अमेरिका र युरोपका केही देशहरुले रुसी कूटनीतिज्ञहरूलाई देश निकाला गरिरहेको अवस्थामा यस्तो मुलुकको सूचीमा पछिल्लो समयमा अष्ट्रेलिया पनि थपिएको जनाइएको छ ।

बेलायतले त्यहाँ एकजना पूर्व रुसी गुप्तचर कर्मचारीमाथि मस्तिष्कमा नै असर पार्ने खालको विषाक्त प्रकृतिको वस्तुको प्रयोगगरी हमला गरिएको आरोपमा बेलायतले पनि रुसी कूटनीतिज्ञलाई निकाला गरेको थियो ।

अष्ट्रेलियाका प्रधानमन्त्री माल्कोम टर्नबुलले युरोपमा पनि निकै लामो समयपछि यस्तो विषाक्त वस्तुको प्रयोगबाट स्तब्ध पार्ने खालको हमला गरिएको स्पष्ट गरे।

अष्ट्रेलियाले पनि दुईजना रुसी कूटनीतिज्ञलाई निकाला गर्ने आदेश दिएको यहाँका सरकारी अधिकारीहरुले बताएका छन् । उनीहरुले ती कूटनीतिज्ञलाई आफै देश छोड्न आदेश दिँदै सार्वजनिक सूचना नै प्रकाशन गरेका छन् ।

यसअघि संयुक्तराज्य अमेरिका, बेलायत र क्यानाडाले ती देशहरुमा अनावश्यक विषय र अवस्थामा जासुसी गरेको आरोप लगाएर केही रुसी कूटनीतिज्ञहरूलाई देशनिकाला गरेका छन् ।

यसरी देश निकालामा परेका रुसी कूटनीतिज्ञको संख्या एक सय नाघेको बताइएको छ । यस्तो प्रकृतिको विषालु पदार्थको हमला गरिएका पूर्व रुसी जासुस सेर्गेइ स्क्रीपाल र उनकी छोरी गम्भीर बिरामी परेका छन् ।

उता प्राप्त अर्को एक समाचारमा जनाइएअनुसार रुसले पनि आफ्नो देशका विरूद्धमा चालिएका पछिल्ला कदमहरूको प्रतिवाद गर्ने भन्दै रुसबाट बृटिश कूटनीतिज्ञहरुलाई पनि निष्कासन गर्ने बताएको छ ।

रुसले २३ जना बृटिश कूटनीतिज्ञलाई निष्कासन गर्ने भएको निर्णय हालैमात्र सार्वजनिक गरेको हो ।

रुसको विदेश मन्त्रालयले रुसको राजधानी मस्कोमा रहेको बृटिश दूतावासका कूटनीतिक कर्मचारीलाई नै यसरी निष्कासनको तयारी गरेको हो ।

रुसले ती कर्मचारीहरुलाई एक साताभित्रमा देश छोड्न आदेश दिइसकेको छ । यही मार्च ४ मा पूर्व रुसी गुप्तचरमाथि भएको भनिएको यस्तो विषाक्त पदार्थसहितको हमलामा रुसको संलग्नता रहेको आरोप बृटिश सरकारको छ ।

त्यस आरोपछि बृटेनले २३ जना रुसी कूटनीतिज्ञलाई देश छोड्न आदेश दिएको थियो । त्यसै कार्यको अर्को प्रतिक्रियास्वरुप रुसले पनि यसरी बृटिशमाथि यो कारबाही गरेर जवाफ दिएको हो ।

उता संयुक्तराज्य अमेरिकाले आफ्नो मुलुकमा कार्यरत ६० जना रुसी कूटनीतिज्ञलाई यसअघि नै देश छोड्न आदेश दिइसकेको प्राप्त अर्को एक समाचारमा जनाइएको छ ।

अमेरिकाको सिटलस्थित रूसी महावाणिज्यदूतावासमा कार्यरत ती कूटनीतिज्ञलाई बन्द गराई त्यहाँ रहेका रुसीलाई देश छोड्न भनेको हो ।

अमेरिकी ट्रम्प प्रशासनले यसबारे रूसलाई जानकारी गराइसकेको छ । निष्कासन भएका रूसी अधिकारीले एक हप्ताभित्र अमेरिका छोड्नुपर्ने छ ।  रूसी राष्ट्रपति भ्लादिमिर पुटिनका विरुद्धमा अमेरिकी प्रशासनले गरेको यो अहिलेसम्मकै सबैभन्दा कडा निर्णय हो भनिएको छ ।

यसै विषयमा जर्मनी र फ्रान्सले पनि सोमबार नै चार चार जना रूसी अधिकारीलाई फिर्ता पठाउने निर्णय गरेका छन् । यसरी यी रुसी कूटनीतिज्ञलाई देश निकाला गर्ने अभियान युरोपमा पनि पुगेको छ ।

यसैगरी युरोपेली यूनियनका सदस्य अन्य १४ राष्ट्रले पनि क्रमशः रूसलाई एक्लाउने नीति अनुरूप कडा कदम चाल्न सहमत भएका अर्को एक समाचारमा जनाइएको छ ।

यसैबीच रूसले भने आफ्ना कूटनीतिज्ञहरुलाई फिर्ता पठाउने गरी गरिएका यी पछिल्ला निर्णयहरुको कडा शब्दमा विरोध गरेको छ ।

यस विषयमा प्रतिक्रियादिँदै रुसले आफ्नो देशका विरुद्धमा भएका यी आफूहरुलाई एक्लाउने क्रियाकलापहरुको जवाफ उचित समयमा उचित रुपमा दिइने बताएको छ ।

यस विषयमा नवनियुक्त रुसी राष्ट्रपति भ्लादिमिर पुटिनले कुनै प्रतिक्रिया दिनुभएको छैन । तर रुसी विदेश मन्त्रालयले विभिन्न देशहरुका यी कदमहरुको कडा शब्दमा विरोध गरेको छ । एएफपी