arrow

एमाले र माओवादी विघटन गरेर नयाँ पार्टी बनाउन प्रचण्डको प्रस्ताव

वैशाख २२ मा हुने भनिएको एमाले- माओवादी एकिकरण अनिश्चित

logo
प्रकाशित २०७५ वैशाख २१ शुक्रबार
oli-prachanda.jpg

काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले कम्युनिष्ट पार्टीहरुको एकतामा ढिलाइ गर्न नहुने बताएका छन् ।  ‘कार्ल माक्र्स जन्म द्विशतवार्षिकी समारोह समिति’ ले शुक्रवार यहाँ आयोजना गरेको ‘आजको माक्र्सवाद, लोकतन्त्र, समृद्धि र समाजवाद’ विषयक राष्ट्रिय गोष्ठीको उद्घाटन गर्दै उनले नेकपा एमालेसँगको एकता केही दिनभित्रमा नै हुने बताए ।

अध्यक्ष दाहालले यसमा ढिलाइ भए मुलुक पुनः अराजकता र असफलताको भूमरीमा फस्ने बताउँदै कतिपय विदेशी वुद्धिजीवीले नेपाल राष्ट्र नै असफल हुनसक्छ भनी गर्ने गरेका विश्लेषणलाई गलत सावित गर्न एकता गरेर आफूहरुले विश्वलाई नयाँ सन्देश दिने खोजेको छ भने।

उनले भने, “पार्टी एकतापछि नेपाल राष्ट्र झन् शक्तिशाली भएर समृद्धिको यात्रामा अगाडि बढ्नेछ, हामी एमाले र माओवादी केन्द्र विघटन गरेर नयाँ पार्टी निर्माणको चरणमा छौँ, पुरानो आग्रह र पूर्वाग्रहबाट मुक्त भई नयाँमा रुपान्तरण हुन आवश्यक छ ।”

अध्यक्ष दाहालले एमालेसँगको एकतामा एकाध बाहेक सबै कम्युनिष्ट केन्द्रित हुन आइपुग्ने अवस्था आउने पनि बताए ।

नयाँ नयाँ प्रस्ताव आइरहेको तथा आन्तरिक व्यवस्थापनमा देखिएको झमेलाका कारण बैशाख २२ मा हुने भनिएको पार्टी एकिकरण अन्तत नहुने निश्चित प्राय भएको छ । २० गते एमाले अध्यक्ष ओली र माओवादी अध्यक्ष प्रचण्डले पटक पटक वार्ता गरेपनि दुवै पार्टीका नेताहरुको व्यवस्थापन गर्न नसकेकै कारण निष्कर्षमा पुर्‍याउन नसकेको विश्लेषकहरुको बुझाइ छ । तर नेताहरु भने पार्टी एकिकरणको रटान हरेक जसो कार्यक्रममा भनिरहदा कार्यकर्ताहरु रनभुल्लमा परेका छन् । 

एमालेका वरिष्ठ नेता झलनाथ खनालले उपभोक्तावादी चिन्तन र बुर्जुवा संस्कृतिलाई अन्त्य गर्दै समाजवादको आधारशीला खडा गर्न कम्युनिष्ट एकीकृत हुनुको विकल्प नभएको बताए ।

एमालेका नेता माधवकुमार नेपालले शान्तिपूर्ण रुपान्तरण र समाजवाद उन्मुख प्रणालीमार्फत् समृद्धि हासिल गर्ने विचार, मूल्य, मान्यता र सिद्धान्तमा कुनै विवाद नभएकाले एकतामा अवरोध नआउने धारणा व्यक्त गरे ।


एमालेका उपाध्यक्ष वामदेव गौतमले नेपालमा आजको माक्र्सवादको सम्मान नै पार्टी एकता हो भने ।

समितिका अध्यक्ष एवं एमालेका उपमहासचिव घनश्याम भुषालले दुई दिनसम्म चल्ने गोष्ठीमा माक्र्सवाद, लोकतन्त्र, समृद्धि र समाजवादबारे विषय विज्ञहरुले कार्यपत्र प्रस्तुत गर्ने जानकारी दिए । उनले १० हजार युवालाई माक्र्सवादबारे प्रशिक्षण दिने तयारी भएको पनि बताए ।



लोकप्रिय समाचार
लोकप्रिय समाचार
नयाँ