कांग्रेस कार्यसमिति बैठक बहिष्कार गर्दै केन्द्रीय कार्यालयमा उजुरी
कांग्रेसमा आन्तरिक किचलो बढ्यो
प्रकाशित २०७५ वैशाख २६ बुधबार
459
Shares
त्रिपुराकोट । जिल्लामा नेपाली कांग्रेसको आन्तरिक किचलो बढ्दै गएको छ । पार्टी भित्रै गुट–उपगुट सिर्जना हुन थालेपछि डोल्पा कांग्रेस आन्तरिक किचलोमा फसेको हो । गत पुस ३ गते सभापति पक्षले अवैधानिक रुपमा जिल्ला कार्यसमिति विस्तार गरेको आरोपमा सचिव पक्षका समूहले त्यसको विरोध गर्दै आएको छ ।
जिल्ला कार्यसमितिमा १८ जना हुनुपर्नेमा पार्टीको विधान विपरीत संख्या बढाएर २४ पुर्याएको भन्दै पार्टी सचिव, ६ जना जिल्ला कार्यसमिति सदस्य, दुई जना महासमिति सदस्य, चार जना महाधिवेशन प्रतिनिधि, तरुण दल, नेवि संघ, दलित संघ किसान संघ लगायतको टोलीले गत मंगलबारको जिल्ला कार्यसमिति बैठक बहिष्कार गरेको सचिव जयनन्द उपाध्यायले जानकारी दिए ।
विधानअनुसार पाँच वर्षसम्म क्रियाशील सदस्य नवीकरण पनि नभएको, क्षेत्रीय प्रतिनिधि र निर्वाचित जिल्ला कार्यसमितिको सदस्य पनि नभएको व्यक्तिलाई पार्टीको विधान मिचेर उपसभापति र पार्टी सचिवमा मनोनीत गरेको सचिव पक्षको आरोप छ ।
जिल्ला पार्टी सचिव, उपसभापती पदमा निर्वाचित हुनका लागि निरन्तर क्रियाशील सदस्यता पाँच वर्षसम्म नवीकरण भएको हुनुपर्ने विधानमा उल्लेख छ । सभापति बुढाले अवैधानिक रूपले विस्तार गरेको जिल्ला कार्यसमिति सदस्य खारेज गर्न माग राख्दै मंगलबार पार्टीको केन्द्रीय कार्यालय सानेपामा उजुरी दर्ता गराई सकिएको सचिव उपाध्यायले बताए । रासस
