काठमाडौं । इजिप्टका स्ट्राइकर मोहम्मद सलाह टोलीको प्रशिक्षणमा फर्किएका छन् । रुस विश्वकपको अन्तिम प्रशिक्षणमा सलाह टोलीमा फर्किएका हुन् ।
च्याम्पियन्स लिगको फाइनलमा काँधको चोटको सामना गरेपछि अहिले उपचार गराइरहेका सलाह कायरोमा भइरहेको अन्तिम चरणको प्रशिक्षणमा सहभागी बनेका हुन् ।
शनिबार सलाहले आफू विश्वकपको लागि तयार रहेको बताएका थिए । २५ वर्षीय खेलाडीको स्वास्थ्यको अवस्था इजिप्टका राष्ट्रपति अब्देल एल–सिसिले टोलीको बिदाइ गर्दाको समयमा सही रहेको पाइएसँगै उनी टोलीको प्रशिक्षणमा देखिएका हुन् ।
२८ वर्षमा पहिलोपटक टोलीलाई विश्वकपमा पुर्याएका सलाहले यो प्रतियोगिता गुमाउने विषयमा धेरै आशंकाहरु देखिएका थिए । जुलाई १६ मा इजिप्टले आफ्नो पहिलो खेल उरुग्वेसँग खेल्दैछ । उसको समुहमा रसिया र साउदी अरेबिया पनि रहेका छन् ।
शनिबार बोल्दै सलाहले आफू पहिलो खेलका लागि नै तयार रहेको बताएका छन् । उनले राष्ट्रपतिलाई पनि आफूले यो विश्वकपमा निकै राम्रो प्रदर्शन गरेर घर फर्किने बचन दिएका थिए । आफ्नो सपना कहिल्यै पनि खेर जान नदिने उनले बताएका थिए ।
इजिप्टको टोलीमा मोहम्मद सलाहको भूमिका निकै महत्वपूर्ण रहेको देखिएको छ । सलाहले यो सिजनमा लिभरपुलको तर्फबाट पनि निकै राम्रो प्रदर्शन गरेका थिए । उनकै उत्कृष्ट प्रदर्शनको सहयोगमा लिभरपुल च्याम्पियन्स लिगको फाइनलमा पुगेको थियो ।
