काठमाडौं । रुसमा भइरहेको विश्वकप फुटबलमा जापानले शानदार सुरुआत मात्र गरेको छैन व्यक्तिगत रुपले कीर्तिमान पनि बनाएको छ । 

एसियाको प्रतिष्ठा जोगाउने क्रममा जापानले समूह एच अन्तर्गत मंगलबार भएको खेलमा कोलम्बियालाई २–१ ले हराउँदै कीर्तिमान रच्यो । यो कीर्तिमान भने उसले अहिलेसम्म दक्षिण अमेरिकी देशहरुलाई हराउन सकेको थिएन । 

यसअघि १७ पटक खेल्दा एक खेल पनि नजितेको जापानले कोलम्बियालाई हराएर जितिविहिन यात्रालाई पूर्णविराम लगाइदिएको छ । कोलम्बियासँग पनि यसअघि तीन पटक भिडन्त हुँदा एक खेल बराबरी गर्दा दुई खेलमा हार व्यहोरेको थियो । 

एसियाका साउदी अरेविया, अष्ट्रेलिया र दक्षिण कोरियाले हारबाट रुसको यात्रा अगाडि बढाइरहँदा जापानले सुखद सुरुआत गर्यो । 

खेल पनि जापानले राम्रो खेलेको थियो । ८७ मिनेट १० जनाको भरमा खेलेको कोलम्बियालाई दबाबमा राख्न सफल भयो । तेस्रो मिनेटमै कार्लोस सान्चेज रातो कार्ड खाँदै मैदानबाट बाहिरिएपछि कोलम्बिया १० खेलाडीमा सिमित भएको थियो । सान्चेजले डि बक्सभित्रै हातले बल रोकेर तत्काललाई गोल रोके पनि त्यो उनका लागि करियरमै घातक निर्णय ठहरियो । 

पेनाल्टीलाई जापानी शिन्जि कागावाले गोलमा परिणत गरे । केही कमजोर देखिए पनि मनोबलमा उच्च रहेको कोलम्बियाले ३९औँ मिनेटमा बराबरी गोल फर्कायो । हुवाँ क्विन्टरोले बराबरी गोल गरे । 

७३औँ मिनेटमा जापानका युया ओसाकोले गोल गर्दै जापानलाई २–१ ले जिताए । कोलम्बिया दबाबमा आउँदा दुई खेलाडीले पहेँलो कार्ड पाए । फाउल पनि बढी नै गरे । 

१५ फाउल कोलम्बियाबाट हुँदा जापानले ९ फाउल खेलेको थियो । जापानले बललाई ५९ प्रतिशत आफ्नो नियन्त्रणमा राख्दा कोलम्बियाले मात्र ४१ प्रतिशत राखेको थियो । 

जापानले गोलको प्रयास पनि धेरै नै गरेको थियो । जापानले ६ प्रहार गर्दा कोलम्बियाले मात्र ३ प्रहार गर्न सक्यो । 

यो खेल हेर्दा जापान अब अर्को चरणमा त पुग्ने पक्का जस्तै छ त्यो भन्दा पनि आगामी खेल अझ बढी सशक्त खेल्ने देखिन्छ । 

पूरै खेलभरी जापानका जम्मा एक जना खेलाडीले पहेँलो कार्ड पाए । जापान यो जीतसँगै समूहको शीर्ष स्थानमा उक्लिएको छ । यही समूहमा रहेका पोल्याण्ड र सेनेगलबीचको खेल सकिएपछि विश्वकपको पहिलो चरणका खेल सकिने छन् ।