विश्वकपमा ठीकठाक फ्रान्स, अर्को चरणमा डेनमार्क कि अष्ट्रेलिया
प्रकाशित २०७५ असार ८ शुक्रबार
744
Shares
काठमाडौं । रुस पुग्नुअघि फ्रान्स विश्वकप फुटबलका लागि तयार छ त भन्ने प्रश्न खड्किएको थियो । त्यसको जवाफ फ्रान्सले अहिले दिएको छ ।
फ्रान्स राउन्ड अफ सिक्सटिनमा पुगेको छ । त्यो पनि लगातार दुई जितसहित । फुटबलमा कस्तो खेल्यो भन्नुभन्दा पनि गोल गरेर खेल जितेपछि पुग्यो ।
युवाहरुले भरिएको फ्रान्स विश्वकपका लागि तयार छैन भनी अन्तर्राष्ट्रिय मिडियाहरुले आलोचना पनि गरेका थिए ।
फ्रान्सले त्यसको जवाफ खेलमार्फत दिएको छ । फ्रान्सले पहिलो खेलमा अष्ट्रेलियालाई २–१ ले हरायो । दोस्रो खेलमा बिहिबार राति पेरुलाई १–० ले हरायो ।
दुवै खेल फ्रान्सले उत्कृष्ट खेलेर जितेको भने हैन । निकै संघर्षले जितेको हो । महत्वपूर्ण ६ अंकसहित फ्रान्स एक खेल खेल्नुअघि नै राउण्ड अफ सिक्सटिनमा पुगेको हो ।
पेरुविरुद्धको खेल निरस थियो । ३४ औं मिनेटमा काइलियान एमबाप्पेले गोल गर्नुपूर्व दुवै टिमका खेलाडीले १–१ पहेंलो कार्ड पाएका थिए । त्यसपछि फेरि १–१ वटा पहेंलो कार्ड पाए ।
फ्रान्सले जम्मा चार वटा प्रहार गोलका लागि गर्यो । त्यस्तै पेरुले जम्मा दुई वटा प्रहार । फ्रान्सले महत्वपूर्ण ३ अंक त ल्यायो तर उसको बल नियन्त्रण प्रतिशत केवल ४४ प्रतिशत मात्र थियो ।
फ्रान्सले ११ फाउल गर्दा पेरुले १५ फाउल खेलेको थियो । खेलमा दुवै टिमको जित्ने उत्तिकै अवसर थियो । तर बाजी मार्यो फ्रान्सले ।
फ्रान्सले उत्कृष्ट खेल्न बिर्से पनि यस्तो लाग्दैछ कि नकआउट चरणमा पुगेपछि आफ्नो १०० प्रतिशत खेल खेल्नेछ । पेरुको भने विजोग भएको छ । पेरु लगातार दुई हारसहित विश्वकपबाट बाहिरिएको छ ।
समूह सी बाट ६ अंकसहित फ्रान्स अर्को चरणमा पुग्दा ४ अंकको डेनमार्क र १ अंकको अष्ट्रेलियामध्ये एक टिम अर्को चरणमा जानेछ ।
समूहको अन्तिम खेलमा फ्रान्सले डेनमार्कसंग र अष्ट्रेलियाले पेरुसंग खेल्न बाँकी छ । दुवै खेल जुन २६ तारिखमा खेल्नेछन् ।
