काठमाडौं । शुक्रबार विश्वकपको समुह डी अन्तर्गत ब्राजिल र कोस्टारिकाको बीचमा प्रतिस्पर्धा हुँदैन । शुक्रबार साँझ पौने ६ बजेबाट उनीहरुको बीचमा सुरु हुनेछ । पहिलो खेलमा स्वीट्जरल्याण्डसँग बराबरी खेलेपछि दबाबमा रहेको ब्राजिल छैटौं उपाधिको खोजीमा रहेको टोली हो । अघिल्लो विश्वकप घरमै आयोजना गरेर पनि उपाधिमा कब्जा राख्न नसकेको यो मुलुक राम्रो तयारीका साथ रुस पुगेको छ । 

यद्यपि पहिलो खेलमा बराबरी खेलेपछि ब्राजिल दबाबमा रहेको हो । सन् २०१४ को सेमिफाइनलमा जर्मनीसँग बेहोरेको ७–१ को हारपछि सन् २०१५ मा भएको कोपा अमेरिकामा पनि ब्राजिल नकआउट चरणबाट बाहिरिएको थियो । जसको कारण ब्राजिलको आलोचना हुँदै आएको अवस्थामा विश्वकप छनोटमा भने ब्राजिलले सबैलाई राम्रो जवाफ दिएको थियो । उसले छनोटका १८ खेलमा १२ खेल जितेको थियो भने केवल एक खेल हारेको थियो ।

ब्राजिलको लागि गोल गर्नमा कुनै समस्या छैन जसको कारण आजको खेलमा स्विट्जरल्याण्डलाई ब्राजिललाई रोक्नु एक चुनौती हुनेछ । नेयमार ग्राबियल जेसस, विलियम, रोबर्टो फर्मिनो र काउटिन्होजस्ता खेलाडीहरुलाई ब्राजिलको टोलीलाई थप उर्जा प्रदान गर्नेछन् । रक्षा पंक्तिमा पनि ब्राजिललाई मात दिनु त्यति सजिलो छैन ।

कोस्टारिकाले पनि रुस विश्वकपको आफ्नो पहिलो खेलमा सर्वियासँग हार बेहोरिसकेको छ । सन् २०१४ को विश्वकपमा अप्रत्याशित खेल देखाएको टोलीले यस विश्वकपको सुरुवात भने राम्रो गर्न नसकेको हो । अघिल्लो विश्वकपमा कोष्टारिका क्वाटरफाइनलसम्म पुगेको थियो । 

कोष्टारिकाले क्वाटरफाइनलसम्मको यात्रा तय गर्नेमा विश्वस्त हुने आधार थिएनन् । तर इटाली, इङल्यान्ड र उरुग्वे रहेको समुहमा रहेको कोष्टारिकाले बाजी मार्यो र क्वाटरफाइनलमा पुग्यो । कोष्टारिका त समुह बिजेता नै बनेर प्रिक्वाटरफाइनल पुगेको थियो । पछिल्लो विश्वकपमा रहेका १२ खेलाडी यसपटक पनि छन् । त्यो अनुभवले कोष्टारिकालाई साथ दिन सक्छ । 

प्रशिक्षक ओस्कार रामिरेजले परिपक्व खेलाडीहरुको टोली बनाएका छन् । यो टोलीका केलोर नाभास निकै महत्वपूर्ण खेलाडी हुन् ।  स्पेनिस क्लव रियाल मड्रिडको टोलीबाट पछिल्ला वर्षहरुमा सबैखाले सम्भव उपाधि जितिसकेका नाभासले कोष्टारिकालाई मजबुद बनाउने छन् । उनले सर्बियाको प्रहारलाई निस्तेज पार्नेछन् । उनी विश्वकै उत्कृष्ट गोलकिपरको लिष्टमा पर्छन् । 

ब्रायन रुइज, जोइल क्याम्पवेल जस्ता खेलाडीको साथले कोस्टारिकालाई पनि बलियो बनाएको छ । यद्यपि एक खेल हारिसकेको टोलीका लागि माथिल्लो चरणमा पुग्ने आशा कायम राख्न शुक्रबारको खेलमा कम्तीमा बराबरीको नतिजा हासिल गर्नुपर्ने हुन्छ । 

 हेड टु हेड 

यी दुई टोलीहरुको बीचमा शुक्रबार ११ औं भेट हुन लागेको हो । यसअघिका १० भेटमा ब्राजिल हाबी भएको देखिन्छ । ब्राजिलले यसअघिका नौ खेलमा जितको नतिजा हासिल गर्दा कोस्टारिकाले केवल एक खेलमात्र जितेको छ । सन् २००४ पछि भने यी दुई टोलीहरुको बीचमा केवल दुई पटक भेट भएकोछ । सन् २०११ र २०१५ मा भएका दुई मैत्रीपूर्ण खेलमा ब्राजिल विजयी भएको थियो । 

प्लेयर्स टु वाच 
फिलिप काउटिन्हो (ब्राजिल)
नेयमारको उपस्थिति तथा प्रदर्शनको विषयलाई लिएर प्रश्नचिन्ह खडा भइरहेको अवस्थामा ब्राजिलको लागि फिलिप काउटिन्होको भूमिका निकै महत्वपूर्ण हुन सक्छ । स्वीट्जरल्याण्डविरुद्धको खेलमा पनि काउटिन्होले गोल गरेका थिए । 

जोहान भेनेगस (कोस्टारिका)
बायाँ साइडबाट खेल्ने यी खेलाडीको भूमिका कोस्टारिकाको लागि शुक्रबारको खेलमा निकै महत्वपूर्ण हुनेछ । यी खेलाडीले कोस्टारिकाको लागि विश्वकपमा छनोट चरणमा तीनपटक गोल गरेका थिए । साथै उनको प्रदर्शन पनि निकै राम्रो रहँदै आएको छ ।