दुई पटकको च्याम्पियन अर्जेन्टिनाको विश्वकपमा ‘फुलस्टप’, फ्रान्स क्वार्टरफाइनलमा
प्रकाशित २०७५ असार १६ शनिबार
394
Shares
काठमाडौं । दुई पटकको च्याम्पियन अर्जेन्टिनाको विश्वकप फुटबलमा ‘फुलस्टप’ लागेको छ । शनिबार राति भएको प्रिक्वार्टरफाइनल खेलमा एक पटकको च्याम्पियन फ्रान्सले ४–३ ले पराजित गरेको हो ।
२–१ ले अग्रता लिएर पनि त्यसलाई बचाउन नसकेको गत सस्करणको रनरअप अर्जेन्टिनाको कमजोर डिफेन्स लाइन हारको कारण बन्यो । खेलको १३ मिनेटमा एन्टोइने ग्रेजम्यानको पेनाल्टी गोलबाट अग्रता लिएको फ्रान्सले ४१ औं मिनेटमा एन्जेल डी मारियाको गोल खाँदा बराबरीमा आयो ।
४८ औं मिनेटमा लिओनल मेस्सीको पासमा गाब्रिएल मार्काडोले गोल गर्दै अर्जेन्टिनाले २–१ ले अग्रता लियो ।
तर त्यसपछि ११ मिनेटको अन्तरमा फ्रान्सले तीन गोल गर्यो । ५७ औं मिनेटमा बेन्जामिन पभार्डले तथा ६४ औं र ६८ औं मिनेटमा काइलियन एमबाप्पेले गोल गरे ।
त्यसपछि कमजोर सावित भएको अर्जेन्टिनाका लागि इन्जुरी समयको तेस्रो मिनेटमा सर्जियो अगुएरोले गोल गर्दै टिमलाई खेलमा फर्काउने प्रयास गरे पनि समय अपुग भएका कारण अर्जेन्टिना हार्यो ।
यसअघिको विश्वकपमा भएका दुई भिडन्तमा अर्जेन्टिना विजयी भएको थियो । तर इतिहासले काम नगर्दा हार्न पुग्यो ।
फ्रान्समा अनुभवी एवं युवा खेलाडीहरुको वर्चश्व भएकाले राम्रो प्रदर्शन गरेको छ ।
