काठमाडौं । फ्रेन्च फुटबल स्टार केलियन एम्बाप्पे बल्ल १९ वर्षका भए । तर उनी रेकर्ड बनाउने मामलामा अगाडि बढेका छन् । उनले शनिबार राति अर्जेन्टिनालाई फ्रान्सले ४–३ ले हराउँदा २ गोल गरेका थिए । यही गोलले उनलाई ब्राजिलियन फुटबल लिजेन्ड पेलेसंग तुलना गर्न मद्धत पुग्यो ।
कम उमेरमा नकआउट चरणमा दुई गोल गर्ने कीर्तिमानसंग एम्बाप्पेले पेलेको बराबरी गरेका हुन् । पेलेले १८ वर्षको उमेरमा सन् १९५८ को विश्वकपमा नकआउट चरणमा २ गोल गरेका थिए । त्यो कीर्तिमान एम्बाप्पेले बराबरी गरे ।
सो विश्वकपमा पेलेले ६ गोल गरेका थिए। एम्बाप्पेले जारी विश्वकपमा ४ खेलमा ३ गोल गरिसकेका छन् । उनको भविष्य भर्खर सुरु भएकाले आगामी विश्वकपमा त उनी देखिने छन् नै यही रुस विश्वकपको क्वार्टरफाइनलमा पुगेपछि अझ बढी रेकर्ड नबनाउलान् भन्न सकिन्न ।
एम्बाप्पेमा यस्तो तीव्र गतिमा दौडेर गोल गर्ने क्षमता छ कि जसले गर्दा विपक्षीलाई ‘जिल’ पार्न सफल भएका छन् ।
सन् १९९८ डिसेम्बर २० मा फ्रान्सको बोन्डीमा जन्मेका एम्बाप्पे मोनाकोबाट पिएसजीमा लोनमा व्यवसायीक खेल खेल्दै आएका छन् ।
