भक्तपुर क्षेत्रमा १० घण्टाको अवधिमा १ सय २९.६ मिलिमिटर वर्षा
प्रकाशित २०७५ असार २८ बिहिबार
491
Shares
भक्तपुर । भक्तपुर क्षेत्रमा १० घण्टाको अवधिमा १ सय २९ दशमलव ६ मिलिमिटर वर्षा भएको छ । भक्तपुर र आसपास रहेका विभिन्न वर्षामापन केन्द्रहरुको मापनअनुसार भक्तपुरमा १ सय २९ दशमलव ६ मिलिमिटर वर्षा भएको हो ।
यो मापन वुधबार बेलुकीदेखि बिहीबार सम्मको रहेको मौसम पुर्वानुमान महाशाखाले जनाएको छ । भक्तपुरमा पछिल्लो ४ वर्षमा योसहित २ वटा ठुला बाढीका घटना भएका छन ।
१०० किलोमिटर स्क्वायर भन्दा ठुलो क्षेत्रमा फैलिएको जलाधारको लागि त्यसमा प्रबाह हुन सक्ने बहाबको सहि मुल्यांकन नगरी संरचनाहरु निर्माण हुनु र नदी संकुचन भएकाले पनि बाढीले क्षति पुगेको हो ।
यसैगरी, नगरकोटमा १ सय १७ मिलिमिर, गोदावरीमा १ सय १५ दशमलव ८ मिलिमिटर र चागुनारायणमा ७६ मिलिमिटर वर्षा मापन गरिएको छ ।
वर्षापछि पहिरो खस्दा चाँगुनारायण नगरपालिका–७ तेलकोटस्थित मजुवामा एउटा टहरो पुरिएको थियो। टहरो पुरिँदा एकै परिवारका तीन जनाको मृत्यु भएको भक्तपुर महानगरीय प्रहरी परिसरका डिएसपी रेवतीरमण पोखरेलले जानकारी दिए । वर्षापछि हनुमन्ते र खस्याङखुसुङ खोलामा आएको बाढीले तटीय क्षेत्र डुबानमा परेको छ ।
उपत्यकामध्ये भक्तपुर क्षेत्रमा भारी वर्षा पछी मनोहरा नदीमा ज्यादै उच्च बहाब भैरहेको छ । तटीय ठुलो क्षेत्रमा बेलुकी सम्मै डुवानको जोखिम देखिन्छ । विष्णुमती, नख्खु, बागमती लगायतमा भने बहाबले खतरा पार गरेको बाढी सर्तकता केन्द्रले जनाएको छ ।
