काठमाडौं । विश्वकप फुटबलको तेस्रो स्थानका लागि भएको खेलमा बेल्जियम विजयी भयो । रुसको सेन्ट पिटर्सबर्ग स्टेडियममा भएको तेस्रो स्थानको भिडन्तमा शनिबार राति इंगल्याण्ड २–० ले पराजित भयो ।
इंगल्याण्डले खेलको सुरुआतदेखि नै डिफेन्सिभ खेल्दै आयो । ६४ हजार भन्दा बढी दर्शकले प्रत्यक्ष हेरेको खेलमा चौथो मिनेटमै बेल्जियमका थोमस मुनियरले गोल गरेर बेल्जियमलाई अग्रता दिलाए ।
त्यसपछि इंगल्याण्ड आक्रामक बन्ने अपेक्षा गरिएको थियो । तर इंगल्याण्ड झनै डिफेन्सिभ भयो । हाफ टाइमसम्म इंगल्याण्ड निराश भयो ।
हाफटाइमपछि इंगल्याण्डले केही आक्रमण गर्यो । तर त्यसलाई बेल्जियमका गोलकिपरले निस्तेज पारे ।
आधादर्जन प्रयास इंगल्याण्डका विफल भए । इंगल्याण्डको फिनिसिङ नै भएन । ८२ औं मिनेटमा एलेन हजार्डले गोल गर्दै बेल्जियमलाई २–० ले अग्रता दिलाए ।
त्यसपछि पनि गोलका लागि इंगल्याण्डको प्रयास रहेन । खेलमा गोल बिना जित सम्भव नहुने यो खेलले स्पष्ट गर्छ ।
५७ प्रतिशत बल आफ्नो नियन्त्रणमा लिए पनि त्यसको सदूपयोग इंगल्याण्डले गरेन । छोटो पास अनि आपसमै खेल्ने गरेर समय बिताए पनि इंगल्याण्डका खेलाडीले बल अगाडि बढाउनुको सट्टा पछाडि लैजाने काम बढी गरे ।
समग्रमा इंगल्याण्डले आक्रामक खेलेन । जित्नुपर्छ भन्ने मानसिकतामा रहेन । उसले गरेका जम्मा चार फाउलले पनि देखाउँछ कि उसले आक्रमणका लागि कुनै भूमिका नै खेलेन । बेल्जियमलाई जित्नुथियो । विपक्षीसंग टसल गर्नुथियो । सो बीचमा उसले फाउल पनि खेल्यो । ११ फल बेल्जियमबाट भएको थियो ।
महत्वपूर्ण खेलमा फेयर प्ले खेल्न खोजेको इंगल्याण्डको हारले तेस्रो स्थान पनि गुम्यो । सन् १९६६ को विश्वकप जितेको इंगल्याण्ड त्यसयता दोस्रो पटक सेमिफाइनलमा पुगे पनि तेस्रो स्थान भने दुवै पटक ओगटन सकेन ।
कप्तान ह्यारी केनले समूह चरणमै पाँच गोल गरेका थिए । त्यसपछि एक गोलमात्र गरे । उनी अझ बढी हाइ स्कोरर हुन सक्थे । तर जाँगर गरेनन् । उनी ६ गोलबाटै गोल्डेन बुट पाउने खेलाडी बन्ने निश्चित छ । तर इंगल्याण्डको निरश प्रदर्शनलाई एउटा कप्तानले चिर्न सकेन ।
युवा खेलाडीहरु छन् इंगल्याण्डमा । अर्को पटक राम्रो गर्लान् । तर अहिले गर्नुपर्ने काम पछि हुन्छ भनेर के कल्पना गर्ने ?
