- सुन चाँदी दर
- विनिमय दर
- नेपाली पात्रो
- राशिफल
काठमाडौं । अमेरिकी प्रतिबन्धको त्रासको बीचमा भारतले रुससँग अर्को ठुलो रक्षा सम्झौता गरेको छ । एस–४०० मिसाइल सम्झौतापछि रुससँग भारतले अर्को महत्वपूर्ण सम्झौता गरेको हो ।
भारतको गोवामा रुसको सहयोगमा दुई युद्धपोतको निर्माण गरिने भएको हो । मंगलवार भारत र रुसबीच त्यसका लागि ५० करोड अमेरिकी डलरको सम्झौता भएको हो । रक्षा सहयोगअन्तर्गत यो सम्झौता भएको हो ।
अहिले भएको सम्झौताअनुसार रुसले भारतमै युद्धपोत निर्माणको लागि रुसले केही महत्वपूर्ण प्राविधिक सहयोग गर्नेछ । जसमा उसले डिजाइन, प्रविभि र अन्य केही सामग्रीहरु दिनेछ ।
अहिले भएको सम्झौताअनुसार सन् २०२० बाट यो युद्धपोतको निर्माण सुरु हुनेछ । समयमा काम भएको खण्डमा २०२६ सम्ममा पहिलो युद्धपोतको निर्माण कार्य सकिनेछ भने दोस्रोको निर्माण २०२७ मा सकिने अनुमान गरिएको छ ।
आधुनिक स्तरको यी दुई युद्धपोत भारतको लागि निकै महत्वपूर्ण हुने बताइएको छ । यसल भारतको रक्षा प्रणाली मजबुत बनाउन महत्वपूर्ण सहयोग पुग्ने बताइएको छ । यसअघि नै रुस र भारतको बीचमा १ अर्ब डलरको सम्झौता भइसकेको छ ।
जसअनुसार भारतले २०२३ सम्म दुई युद्धपोत पाउनेछ । एस–४०० मिसाइल रक्षा प्रणाली खरिद गरेको ६ महिनापछि दुई मुलुकको बीचमा यो सम्झौता भएको हो ।
अमेरिकाले भने रुससँग रक्षा सामग्रीहरु किन्ने मुलुकहरुमाथि प्रतिबन्ध लगाउने चेतावनी दिँदै आएको छ । यसअघि पनि अमेरिकाले भारतलाई चेतावनी दिएको थियो तर पछि भने उसले यसमा छुट दिने निर्णय गरेको थियो ।
इरानमाथि लगाइएको प्रतिबन्धमा पनि अमेरिकाले भारतलगायतका ८ मुलुकहरुलाई छुट दिइरहेको छ । यस्तोमा भारतले पुनः रक्षा सम्झौता गर्दा पनि भारतले छुट दिनसक्ने अनुमान गरिएको छ ।