काठमाडौं । मंगलबार डिसेम्बर २५ । क्रिसमस दिवस । क्रिश्चियन धर्मका संस्थापक येशू ख्रीस्टको जन्म जयन्ती । यो अवसरमा देशभरका चर्चमा प्रार्थनालगायत कार्यक्रम भइरहेका छन् ।
८२ वर्षीय पोप फ्रान्सिसले पनि भ्याटिकन सिटीमा क्रिसमस मनाएका छन् । उनले क्रिसमस र नयाँ वर्ष जनवरी १ तारिखको एकैपटक शुभकामना दिएका छन् ।
उक्त भ्याटिकन फेस्टिबलमा १० हजार मानिस सहभागी भएको डेलिमेलले जनाएको छ । पोपसंगै प्रार्थनामा रहनका लागि ६ महिनाअघिदेखि टिकट बुकिङ खुल्ला गरिएका थियो ।
यस दिन एक आपसमा क्रिसमस दिवसको शुभकामना आदान प्रदान गर्छन् । क्रिसमस क्रिश्चियनले मात्र नभइ अन्य धर्माबलम्बीले पनि मनाउने गर्छन् । यसलाई मनोरञ्जन र प्रेमको प्रतीकका रुपमा पनि लिने गरिएको छ ।
दिवस मनाइएका स्थलमा येशूको शिक्षा एवं उपदेशको चर्चा गरिनुका साथै प्रेम प्रकट गर्दै उपहार आदानप्रदान गर्ने, शान्ति, सद्भाव, समृद्धि र सु–स्वास्थ्यको कामना गरिन्छ ।
कर्मचारीलाई चिन्ता
क्रिसमसका बेलामा तलव नपाए के होला ? खर्च गर्ने समय नै यही भएको भन्दै क्रिश्चियनहरु मस्तसंग खर्च गर्छन् । घुमफिर गर्छन् । सान्टाक्लज लगाएर रमाइलो गर्छन् । माया प्रेममा जोडिन्छन् ।
तर विकसित देशमा पनि कर्मचारीलाई तलव नदिएर सताइएको खवर आएको छ । अमेरिका जस्तो देशमा पनि यो समस्या भएर कर्मचारीहरु निराश बनेका छन् ।
अन्य देशमा पनि समयमै तलव नपाएर कर्मचारीहरुको क्रिसमस खल्लो भएको समाचार आएको छ ।
नेपालमा पनि क्रिसमसको रौनक, पर्यटक तान्ने उत्तम उपाय
क्रिसमस पछिल्ला वर्षहरुमा नेपालमा पनि भब्यपूर्वक मनाइन्छ । हिन्दू धर्माबलम्बीहरु पनि यही बहानामा मस्ती गर्ने गर्छन् । विशेष गरी पर्यटक तान्ने उपायका रुपमा पर्यटकीय क्षेत्रहरुमा यसको रौनक हुन्छ ।
यस अवसरमा काठमाडौं उपत्यकाका ठमेल, दरबारमार्ग, बौद्ध, भक्तपुर, ललितपुरलगायत स्थानमा ‘क्रिसमस ट्री’ बनाएर सजाइएको छ । नगरकोट, सौराहा, पोखरा लगायतमा पनि उल्लेख्यमात्रामा यसको रौनक भएको पाइएको छ ।
मुलुकलाई संघीय लोकतान्त्रिक गणतन्त्र, धर्म निरपेक्ष घोषणा गर्नुका साथै राज्यले क्रिसमस पर्वलाई येशु ख्रीष्टको जन्मदिवसका रुपमा मान्यता दिएको छ ।
अहिले नेपालमा १२ हजार चर्च र ३० लाखभन्दा बढी क्रिश्चियन धर्मावलम्बी छन् । २०६४ सालअघि चर्चमा मात्र सीमित हुने गरेको क्रिसमस अहिले सार्वजनिक स्थलमा पनि मनाइने गरेको छ ।
राष्ट्रपति भण्डारीको शुभकामना
राष्ट्रपति विद्यादेवी भण्डारीले क्रिसमसका अवसरमा स्वदेश तथा विदेशमा रहनुभएका सम्पूर्ण इसाई धर्मावलम्बी नेपालीमा सुस्वास्थ्य, सुख, शान्ति र समृद्धिको शुभकामना व्यक्त गरेकी छिन् ।
उनले नेपाल बहुभाषिक, बहुजातीय, बहुसांस्कृतिक, बहुधार्मिक विशेषतायुक्त सुदृढ सामाजिक एकता कायम भएको मुलुक हो भन्दै हाम्रा बहुमूल्य सम्पदाको रूपमा रहेका चाडपर्व, भाषा, संस्कृतिको संरक्षण र प्रवद्र्धन गर्नु सबैको साझा दायित्व भएको बताएकी छिन् ।
नेपालमा मनाइने चाडपर्वले विभिन्न सांस्कृतिक पहिचान बोकेका समुदायबीच सद्भाव र समन्वय अभिवृद्धि गर्न महत्वपूर्ण भूमिका निर्वाह गरेको उल्लेख गर्दै राष्ट्रपतिले सन्देशमा यस्ता पर्वले सबै नेपालीबीच बन्धुत्व, आपसी प्रेम र एकताको भावना बढाएर शान्त र समुन्नत नेपाल निर्माणमा प्रेरणा प्रदान गर्ने विश्वास व्यक्त गरेकी छिन् ।
प्रधानमन्त्री ओलीको शुभकामना
प्रधानमन्त्री केपी शर्मा ओलीले धर्म निरपेक्षता सङ्घीय लोकतान्त्रिक गणतन्त्र नेपालको प्रमुख आधार भएको बताएका छन् । क्रिसमसका अवसरमा शुभकामना सन्देश जारी गर्दै प्रधानमन्त्री ओलीले बहुभाषिक तथा बहुधार्मिक देश नेपालको विद्यमान संविधानले कुनै पनि धर्ममा आस्था राख्ने नागरिकप्रति भेदभाव नगर्ने कुराको प्रत्याभूति गरेको बताए ।
ओलीले पहिलादेखि नै बहुसंख्यक नेपालीले आस्था प्रकट गर्दै आएको सनातन धर्मको अतिरिक्त नेपालमा अन्य धर्म मान्ने मानिसहरुको स्वतन्त्रतासमेत सुनिश्चित गरिएको बताए ।
