काठमाडौँ । नेपाली काङ्ग्रेसले बुधबारदेखि पदावधि समाप्त भएको भ्रातृ संस्था नेपाल विद्यार्थी संघ केन्द्रीय कार्यसमितिलाई दैनिक कार्य सञ्चालन गर्न गराउन निर्देशन दिएको छ । 

काङ्ग्रेस केन्द्रीय कार्यसमितिको गत मङ्सिर २ गतेको बैठकको निर्णयबाट नेविसङ्घ केन्द्रीय समितिको थप गरिएको दुई महीनाको पदावधि आज माघ २ गतेसम्म कायम थियो । 

काङ्ग्रेसले सङ्घ केन्द्रीय समिति तथा मातहतका निकायको पदावधि बुधबारसम्म मात्र भए पनि अब उप्रान्तका लागि काङ्ग्रेस केन्द्रीय कार्यसमितिको आगामी माघ १० गते बस्ने बैठकले निर्णय गरेअनुसार हुने गरी दैनिक कार्य सञ्चालन गर्न गराउन निर्देशन दिएको हो । काङ्ग्रेस केन्द्रीय समितिको बैठक माघ १० गतेका लागि बोलाइएको छ । 

यसअघि नेविसङ्घको केन्द्रीय नेतृत्वले महाधिवेशनको मिति पटकपटक घोषणा गर्ने तर समयमा गर्न नसक्ने देखिएपछि पदाधिकारी र सदस्यले शृङ्खलाबद्ध रुपमा पदबाट राजिनामा गरेका थिए । 

काङ्ग्रेस सभापति शेरबहादुर देउवा समक्ष सङ्घका सात पदाधिकारीले गत पुस २७ गते पदबाट राजीनामा गरेको दुई दिनपछि पार्टी वरिष्ठ नेता रामचन्द्र पौडेलसमक्ष ४५ केन्द्रीय पदाधिकारी तथा सदस्यले पनि पदबाट सामुहिक राजीनामा बुझाएका थिए । नेविसङ्घको वर्तमान केन्द्रीय कार्यसमिति १६६ सदस्यीय छ । 

वर्तमान नेृतत्वले क्याम्पसमा सङ्गठन निर्माण गर्न नसकेको, कुनै पनि आन्दोलन गर्न नसकेको, महङ्गी, भ्रष्टाचार र जघन्य अपराधका मुद्दामा मौन रहेको, जति पटक म्याद थप गरे पनि महाधिवेशन गराउन नसक्ने भन्दै उनीहरुले नैतिकताका आधारमा सामुहिक राजीनामा बुझाएका थिए । 

वर्तमान कार्यसमितिको विसं २०७३ भदौ २ गते दुई वर्षे कार्यकालका लागि निर्वाचन भएको थियो । गत भदौ २ गते कार्यकाल समाप्त भएपछि विधान तह तीन महीना र पछि पार्टीको पहलमा दुई महीना समयावधि थप भएको थियो । 

वर्तमान कार्यसमितिले गत पुस २८, २९ र ३० गते महाधिवेशन गर्न मिति तय गरे पनि एकातिर उक्त समयमा महाधिवेशन हुन सकेन भने अर्कातिर वर्तमान कार्यसमितिको समयावधि नै माघ २ गते समाप्त भएकाले पार्टीले तत्काल दैनिक काम गर्न निर्देशन दिएको पार्टी कार्यालयले जनाएको छ । 

राजिनामा गर्ने पदाधिकारी तथा सदस्यले वर्तमान कार्यसमिति विघटन गरी छ महीनाभित्र महाधिवेशन गर्ने गरी तदर्थ समिति बनाउन पार्टीसमक्ष माग गरेका छन् । 

माघ १० मा भंग 
नेपाली काँग्रेसका सहमहामन्त्री डा प्रकाशशरण महतले माघ १० मा बस्ने पार्टीको केन्द्रीय कार्यसमिति बैठकले अहिलेको कार्यसमिति भंग हुने संकेत गरेका छन् ।

समय थपिएको भए पनि महाधिवेशन गर्न नसकेपछि नेविसंघलाई सुदृढ र गतिशिल बाटोमा लैजान यही कार्यसमितिलाई अगाडि बढाउने वा तदर्थ समिति बनाउने भन्ने १० गते निर्णय हुने बताए । 

उनले भनेका छन्, ‘पार्टी गम्भीर भएको उनीहरुले पनि बुझेका छन्, कार्यसमिति भंग पनि हुन सक्छ ।’

महाधिवेशन गराउने जिम्मा उनकै काँधमा भए पनि सफल हुन सकिरहेका छैनन् । महत नेविसंघ महाधिवेशन निर्देशक समिति संयोजक हुन् । उनले पार्टीको प्रभाव नेविसंघमा पनि परेको भन्दै गुटबन्दी देखिएको स्वीकारे । 

त्रिभुवन विश्वविद्यालयले फागुनमा क्याम्पसहरुको स्ववियुको निर्वाचन गर्ने निर्देशन दिइरहेको अवस्थामा कतै नेविसंघको महाधिवेशन बैशाखतिर हुने हो कि भन्ने आशंका बढेको छ । 

नेता महतले अबका दिनमा अधिवेशन नगरी समय लम्ब्याउने अवस्था नरहने बताएका छन् । उनले समय थप्ने कुनै पनि भ्रातृ संगठनलाई नछाडिने चेतावनी दिँदै अन्य भ्रातृ संगठनलाई पनि समयमै अधिवेशन सकाउन सुझाव दिएका छन् ।