काठमाडौं ।  पछिल्लो चरणमा भारत र पाकिस्तानबीच बढ्दै गएको तनाव, सिमान्त क्षेत्रमा भएको गोलाबारी र हताहतीका घटनाको विरोध गर्दै मानव अधिकार तथा शान्ति समाजले चिन्ता व्यक्त गरेको छ  ।  आणविक अस्त्रको उन्मादमा चुर्लुम्म डुबेका भारत र पाकिस्तानबीच बढ्दो तनावलाई लिएर शान्ति समाजले बिरोध जनाउदै प्रदर्शन गर्न लागेको हो ।

समाजले भारत र पाकिस्तानबीच बढ्दो तनावलाई मथ्थर पार्न, युद्धको होइन शान्तिको भाषा बोल्न, संवाद र सहकार्य प्रवद्र्धन गर्न र निष्कृय रहेको सार्कलाई सक्रिय बनाउन आग्रहसहित २०७६ भदौ ३ गते मंगलबार काठमाण्डौस्थित भारतीय दुतावास ( लैनचौर) र पाकिस्तानी दुतावास (महाराजगञ्ज) अगाडि दिउँसो २ बजे देखि ३ बजेसम्म एकसाथ एकघण्टा धर्ना प्रदर्शन आयोजना गर्ने भएको छ  । धर्ना प्रर्दशनमा समाजका संस्थापक सभापति कृष्ण पहाडीसहित नागरिक अगुवाहरुको सहभागिता रहनेछ ।

शुक्रवार   मानव अधिकार तथा शान्ति समाजले विज्ञप्ति जारी गर्दै  भारत र पाकिस्तानबीच तनाव चुलिँदै गएमा दक्षिण एशियाको शान्ति भंङ्ग हुने र त्यसले विश्व शान्ति नै खलबल्याउने हुँदा द्वन्द चर्काउन होइन घटाउन र त्यसका लागि संवाद अघि बढाउन भारत र पाकिस्तानका सरकारलाई मानव अधिकार तथा शान्ति समाज आग्रह गरेको छ ।

सभापति उत्तम पुडासैनी द्वारा जारी विज्ञप्तिमा भनिएको छ,'  यस्तो बेला ३४ वर्ष अगाडि स्थापना भएको दक्षिण एशियाली क्षेत्रिय सहयोग संगठन सार्क निस्कृय अवस्थामा रहनु दुर्भाग्यपूर्ण रहेको छ । भारत र पाकिस्तानबीच द्वन्द्ध घटाउन र सद्भाव बढाउनका लागि सार्क लाई सक्रिय बनाउन सार्कका सबै देशहरुले पहल गरुन भन्ने आग्रह पनि शान्ति समाज गर्दछ । यसै गरी भारत पाकिस्तानबीचको तनाव मथ्थर पार्ने दिशामा अन्तराष्ट्रिय समुदायले योगदान गर्नु पर्दछ ।'

युद्ध विरोधी संस्था शान्ति समाजले २४ वर्षदेखी युद्ध र आणविक अस्त्रको विरोध गर्दै आएको छ । यसै क्रममा युद्धका कुनै पनि सम्भावनालाई खारेज गर्न आह्वानसहित आधा दशक अगाडिदेखी युद्ध निषेध  शान्ति विशेष अभियान तिव्र पार्दै आएको छ ।