- सुन चाँदी दर
- विनिमय दर
- नेपाली पात्रो
- राशिफल
काठमाडौं । नेपाली कांग्रेसले संघीय संसदमा प्रस्तुत गरी सम्बन्धित विषयगत समितिहरुमा छलफलको क्रममा रहेका तीन विधेयकहरुलाई तत्काल सच्चाउन माग गरेको छ ।
कांग्रेसले नेपाल सरकारद्वारा संघीय संसदमा प्रस्तुत गरेको ‘‘नेपाल नागरिकता ऐन, २०६३ लाई संशोधन गर्न बनेको विधेयक’’, ‘‘सङ्घीय निजामती सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको विधेयक’’, ‘‘सूचना प्रविधिको सम्बन्धमा व्यवस्था गर्न बनेको विधेयक’’ लगायतका संविधान प्रतिकूलका विधेयकहरु सच्चाउन माग गरेको हो ।
कांग्रेस संघीय संसदका प्रमुख सचेतक बालकृष्ण खाणले सोमबार विज्ञप्ति जारी गर्दै विधेयक माथि माननीय सांसदहरुले प्रस्तुत गरेको संशोधन प्रस्ताव र समिति एवं उपसमितिहरुमा राखेको फरक मत प्रति वर्तमान सरकार संवेदनशील नभएकोमा नेपाली कांग्रेस संसदीय दलको गम्भीर ध्यानाकर्षण भएको बताएका छन् ।
विज्ञप्तिमा भनिएको छ,' नेपालको संविधानको प्रस्तावना, प्रावधान र व्यवस्थालाई उलंघन गर्दै संविधान प्रतिकूलका कुनै पनि विधेयकहरु नेपाली कांग्रेसलाई स्वीकार्य छैन । तसर्थ संविधानको व्यवस्था र भावनाको प्रतिकूल हुने गरी प्रस्तुत भएका विधेयकहरुलाई तत्काल सच्चाउन नेपाली कांग्रेस जोडदार माग गर्दछ ।'