शुक्रबारसम्मै वर्षा हुने, काठमाडौंले बुधबार घाम देख्ने छैन, हिले चाडको सम्भावना  

प्रकाशित मिति : २०७६ असोज १ बुधबार

काठमाडौं । यसपटकको चाडबाड हिले हुने सम्भावना बढेको छ । जल तथा मौसम पूर्वानुमान महाशाखाले प्रक्षेपण गर्दै आएको पूर्वानुमानले यसपटकको बडादशैं हिले हुन सक्ने देखिएको हो । 

महाशाखाले बिहीबारदेखि मौसममा सुधार आउने जनाए पनि बुधबार बिहान सार्वजनिक गरेको बुलेटिनले शुक्रबार पनि वर्षा हुने देखाएको छ । बुधबार जुन पूर्वानुमान गरिएको छ त्यही पूर्वानुमान शुक्रबारको दिनलाई पनि गरिएको छ । 

बुधबार काठमाडौं उपत्यकासहित देशका अधिकांश स्थानमा वर्षा भइरहेको छ । यो हल्कादेखि मध्यम वर्षा भइरहेको छ । 

केही स्थानमा भारी वर्षा भएको छ । काठमाडौंमा दिनभर नै वर्षा हुनेछ । मध्य र पश्चिम तथा पूर्वका केही स्थानमा हल्कादेखि मध्यम वर्षा हुने मौसमविद् मञ्जु वासीले बताइन् ।  

काठमाडौंमा मंगलबारदेखि बुधबार बिहानसम्म २३.४ मिलिमिटर वर्षा भएको छ । बुधबार काठमाडौं उपत्यकामा घाम देख्न पाइने सम्भावना नरहेको मौसमविद् वासीले बताइन् । 

बिहानको तापक्रम १९ डिग्री सेल्सियसमात्र रहेको छ । त्यस्तै हल्का हावा पनि चलिरहेकाले चिसो बढेको छ । 

महाशाखाले देशका मध्य र पश्चिमका धेरै स्थानहरुमा तथा पूर्वका केही स्थानमा मेघ गर्जन र चट्याङ सहितको वर्षा हुने साथै देशका थोरै स्थानहरुमा  भारी वर्षाको सम्भावना रहेकोले पहिरो जान सक्ने तथा नदीहरुमा  पानीको वहाब बढ्न सक्ने भएकाले सडक र हवाई यातायातमा सामान्य अवरोध आउन सक्ने हुनाले सतर्कता अपनाउन आग्रह गरेको छ । 

उपत्यका ट्राफिक प्रहरी महाशाखाका अनुसार अरनिको राजमार्गमा पहिरो गएकाले एकतर्फी सवारी सन्चालन भइरहेको छ । 

मौसम पूर्वानुमान महाशाखाका अनुसार हाल मनसुनी न्यून चापीय रेखाको पश्चिमी भाग औसत स्थानको आसपासमा रहेको छ । पूर्वी र मध्य भाग औसत स्थान भन्दा थोरै उत्तरतर्फ रहेको छ । 

त्यस्तै भारतको मध्य प्रदेशको उत्तर पश्चिमी भागमा र उत्तर प्रदेशको दक्षिणी भागमा एउटा निम्न चापीय प्रणाली अवस्थित रहेको छ ।

बंगालको खाडीबाट आएको जलवाष्प युक्त हावाको प्रभावका कारण देशभर मनसुनी गतिबिधि बढिरहेको महाशाखाले जनाएको छ । 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ