नेकपा सांसद पार्वत गुरुङलाई ज्यानमार्ने उद्योगमा पक्राउ पुर्जी

प्रकाशित २०७६ असोज ३० बिहिबार

काठमाडौं । सत्तारुढ दल नेपाल कम्युनिष्ट पार्टी नेकपाका सांसद पार्वत गुरुङलाई ज्यानमार्ने उद्योग मुद्दामा पक्राउ पुर्जी जारी भएको खुलेको छ । उनलाई काठमाडौं जिल्ला अदालतबाट पक्राउ पुर्जी जारी भएको खुलेको हो ।

मुद्दा दर्ता भएको एक वर्षपछि मात्र पक्राउ पुर्जी जारी भएको खुलेको हो । पूर्व माओवादी कार्यकर्ता वीरध्वज खड्काको जाहेरीले नेपाल सरकार वादी भएको उक्त मुद्दामा जिल्ला सरकारी वकिलको कार्यालय काठमाडौंले गुरुङसहित सात जनाविरुद्ध ज्यानमार्ने उद्योगअन्तर्गत मुद्दा चलाएको छ।

स्थानीय तहको निर्वाचन क्रममा दोलखाको गौरीशंकर गाउँपालिका–२, जुँगुका कुलबहादुर तामाङको हत्याको घटनासँग जोडेर मुद्दा हालिएको हो । २०७४ वैशाख २६ गते राति तत्कालीन नेकपा माओवादी र नेकपा एमालेका कार्यकर्ताबीच झडप हुँदा ३३ वर्षीय तामाङको मृत्यु भएको थियो।