arrow

नेपाली सेनाको सैन्य भर्ना छनौट प्रक्रियामा अनियमिततामा संलग्न व्यक्तिहरुलाई कारवाही

logo
प्रकाशित २०७६ कार्तिक ६ बुधबार
nepal-army-1.jpeg

काठमाडौं । नेपाली सेनाको चालिस भर्ना केन्द्रहरुमा पाँच हजार आठ सय जना सैन्य पदको भर्ना छनौट प्रक्रिया भईरहेकोमा केही भर्ना केन्द्रहरुमा किर्ते तथा आर्थिक लेनदेनमा संलग्न भएको आशंकामा चार जना सैनिक तथा तेईस जना गैर सैनिक व्यक्तिहरुको नेपाली सेनाले अनुसन्धान गरी कारवाहीको प्रक्रिया अगाडी बढाएको छ ।

नेपाली सेनाको भर्ना केन्द्र, श्री उत्तर पश्‍चिम पृतना हेक्वामा संचालन भईरहेको सैन्य भर्ना प्रक्रियामा नक्कली परिचय पत्र बनाई किर्ते गरेको आशंकामा तीन जना र श्री नं ५ बाहिनी अड्डा, कैलाली, भर्ना केन्द्रमा आर्थिक लेनदेन गरेको आशंकामा एक जना सैनिक व्यक्तिहरुलाई सैनिक निगरानीमा राखी अनुसन्धानको कार्य नेपाली सेनाले शुरु गरेको छ ।

सोही भर्ना केन्द्रमा नक्कली परीक्षार्थी पठाई परीक्षा दिन लगाउने वास्तविक उम्मेदवार छ जना तथा नक्कली परीक्षार्थी नौ जनालाई जिल्ला प्रहरी कार्यालय, सुर्खेतले पक्राउ गरी अनुसन्धान शुरु गरेको छ भने संलग्न अन्य व्यक्तिहरुको खोजी कार्य भईरहेको छ ।   

यसैगरी सैन्य भर्ना केन्द्र श्री नं २४ बाहिनी अड्डा, जुम्ला तथा श्री नं ५ बाहिनी अड्डा, कैलालीमा नक्कली परीक्षार्थी पठाई परीक्षा दिन लगाएका चार जना नक्कली परीक्षार्थीहरुलाई पक्राउ गरी अनुसन्धान शुरु गरेको छ भने वास्तविक उम्मेदवारहरुको खोजी कार्य भईरहेको छ । अन्य तीन भर्ना केन्द्रहरुमा आर्थिक लेनदेनमा संलग्न चार जना गैर सैनिक व्यक्तिहरुलाई पक्राउ गरी अनुसन्धान शुरु गरिएको छ ।   

प्रधानसेनापति महारथी पूर्णचन्द्र थापाले नेतृत्व सम्हालेदेखि भर्ना छनौट प्रक्रियालाई स्वच्छ, निष्पक्ष र स्वस्थ प्रतिस्पर्धात्मक बनाई नेपाली सेनामा योग्य व्यक्तिको सेवा गर्ने अवसर नगुमोस् भन्‍ने कुरामा महत्त्वका साथ जोड दिदैं आएका छन् ।



लोकप्रिय समाचार
लोकप्रिय समाचार
नयाँ