- सुन चाँदी दर
- विनिमय दर
- नेपाली पात्रो
- राशिफल
काठमाडौं । भारतीय निर्यात–आयात बैंक ( एक्जिम) ले बुधबार २०७२ सालको महाभूकम्पले क्षतिग्रस्त बनाएको नुवाकोट र गोर्खा जिल्लामा आवास निर्माणका लागि तीन अर्ब १० करोड रुपैयाँ नेपाल सरकारलाई प्रदान गरेको छ । भारत सरकारले आवास निर्माणका लागि प्रदान गरेको तेस्रो किस्ताको लागि शोधभर्नाका लागि सहुलियत ऋण व्यवस्थामार्फत एक्जिमले रकम दिएको भारतीय दूतावासले जनाएको छ ।
नुवाकोट तथा गोर्खा जिल्लाका ५० हजार निजी घर पुनर्निर्माणका लागि एक्जिम बैंकले ऋण व्यवस्था (एलओसी) मार्फत ५० मिलियन अमेरिकी डलर उपलब्ध गराउने वाचा गरेको थियो ।
यसका अतिरिक्त भारतले यी घरहरुको निर्माणका लागि अनुदान स्वरुप १०० मिलियन अमेरिकी डलर उपलब्ध गराउने प्रतिबद्घता गरेको थियो । भारतले हालसम्म घरधनीहरुलाई पहिलो र दोस्रो किस्ता गरी ६ अर्ब ९६ करोड (६९.६ मिलियन अमेरिकी डलर) प्रदान गरिसकेको जनाइएको छ ।
घरधनीहरुलाई नेपाल सरकारले निर्धारण गरेको मापदण्ड अनुरुप भूकम्प प्रतिरोधी घर निर्माण गर्न प्रोत्साहन गर्नका लागि भारत सरकारले सामाजिक–प्राविधिक सहजीकरणको सुविधा प्रदान गर्दै आएको छ ।
भारतीय दूतावासले प्रेस विज्ञप्ति जारी गर्दै नेपालमा भूकम्प पश्चात्को पुनर्निमाण परियोजना सम्पन्न गर्न नेपाली जनता तथा नेपाल सरकारलाई निरन्तर सहयोग गर्न भारत सरकार प्रतिबद्घ रहेको समेत जनाएको छ ।