काठमाडौं । भारतद्वारा अतिक्रमित नेपाली सीमा निरीक्षणका लागि कालापानी क्षेत्र गएका उपप्रधानमन्त्री एवं रक्षामन्त्री ईश्वर पोखरेलसहितको टोली फर्किएको छ ।
खराब मौसमका कारण टोली फर्किएको बताइएको छ । सोमबार नेपाली सेनाको हेलिकप्टरमार्फत उनीहरु व्यास गाउँपालिकामा अवस्थित कालापानी क्षेत्र प्रस्थान गरेका थिए । कालापानीभन्दा करिब १५ किलोमिटर वर रहेको छाम्रुङ पुगेपछि माथि जान नसकिएको टोलीका एक सदस्यले बताए ।
त्यस क्षेत्रमा बाक्लो हिउँ परेका कारण हेलिकोप्टरबाटै अतिक्रमित क्षेत्रको निरीक्षण गरेर फर्किएको टोलीमा सहभागी सुदूरपश्चिम प्रदेशका उपसभामुख निर्मला जोशी बडालले बताइन् । “हेलिकोप्टर ल्यान्ड हुने अवस्था भएन”, उनले भनिन्, “हेलिकोप्टरबाटै भारतीय भारतले अतिक्रमण गरेको क्षेत्र हेरियो ।”
भारतले तीन–तीन किलोमिटर क्षेत्रमा राखेका सुरक्षा पोष्ट देखाइएको उनले बताइन् । उनले भनिन्, “हाम्रोतिर निकट भविष्यमै सशस्त्र प्रहरी बलको सीमा सुरक्षा पोष्ट (बिओपी) राख्ने प्रस्तावित स्थलसमेत देखाइएको छ ।”
टोलीमा उपप्रधानमन्त्री पोखरेल सहित प्रतिनिधिसभा सदस्य गणेशसिंह ठगुन्ना, सुदूरपश्चिम प्रदेशसभा उपसभामुख निर्मला जोशी बडाल, प्रदेशसभा सदस्य मानबहादुर धामी, गेल्बुसिह बोहरालगायत सुरक्षा अधिकारीसहित १० जनाको रहेका थिए ।
कालापानीमा सेना राख्दै आएको भारतले पछिल्लो समय आफ्नो नक्सामा समेटेपछि नेपाल र भारतबीच विवाद रहेको छ । नेपालले उक्त भूमि कुनै हालतमा फिर्ता ल्याउने बताउँदै आएको छ । सीमा क्षेत्र निरीक्षणपछि सदरमुकाम खलङ्गामा प्रेस सङ्गठन नेपालद्वारा आयोजित पत्रकार सम्मेलनमा रक्षामन्त्रीसमेत रहनुभएका पोखरेलले नेपालका सीमा क्षेत्रमा क्रमशः सुरक्षा पोष्टहरु थपिँदै जाने बताए । उनले व्यासमा सशस्त्र प्रहरी राख्ने निर्णय भइसकेकाले त्यस क्षेत्रमा बाह्रैमास सुरक्षाकर्मीको उपस्थिति रहने बताए ।
“भारतसँग सीमाको विषयमा सरकारले कुराकानी गर्छ”, रक्षामन्त्री पोखरेलले भने, “सुगौली सन्धिपछि नेपाल सरकारले भारतलाई डेप्लोमेटिक नोट लेखेको यो पहिलोपटक हो, हामी भारतसँग सीमाको विषयमा आँखा जुधाएरै छलफल गर्छौं, कुरामात्र हैन, नेपालको भूमि भएको तथ्यसहित बुझ्ने गरी बुझाउँछौँ ।”
