नेपाल पठाएको कोरोना परिक्षण गर्ने कीट चीन आफैले बाटोमै रोक्यो
गुणस्तरहिन भएको पाएपछि रोकियो बाटोमै
प्रकाशित २०७६ चैत १५ शनिबार
354
Shares
काठमाडौं। चीनले स्थलमार्गबाट नेपाल पठाउने भनेको २ हजार थान मेडिकल कीट गुणस्तरहिन देखिए पछि बाटोमै रोकेको छ । नेपाल पठाउने सामानको गुणस्तर नपुगेको भन्दै चीनले ती मेडिकल कीट नपठाउने जानकारी नेपाली अधिकारीहरुलाई गराएको छ ।
चिनियाँ पक्षले ल्हासास्थित नेपाली महावाणिज्य दूतावास मार्फत सामान नपठाउने जानकारी गराएको हो । चीनले शनिबार तातोपानी भन्सार आइपुग्ने गरी ती सामान पठाउने जानकारी गराएपछि सरकारले बन्द रहेका तातोपानी र रसुवागढी भन्सार कार्यालय खोल्ने निर्णय गरेको थियो ।
चीनले मेडिकल कीट पठाउने भन्दै तातोपानी भन्सारलाई स्ट्यान्डबाइ राख्ने निर्णय गरेसँगै भन्सारसँगै स्वास्थ्य र कृषिका कर्मचारी तातोपानी गइसकेका थिए ।
’गुणस्तर नपुगेको भन्दै चीनले सामान पठाउन अस्वीकार गरेको खबर हामीलाई आएको छ,’ भन्सार विभाग स्रोतले भन्यो ।
कोरोना परिक्षण गर्ने चिनियाँ कीटको गुणस्तरमाथी संसारका अन्य देशहरु स्पेन, चेक गणतन्त्र लगायतमा गम्भिर प्रश्न उठेपछि सम्भवत चीनले यो कदम उठाएको हुन सक्ने स्वास्थ्य क्षेत्रका एक जानकार बताउँछन।
