काठमाडौँ। नेपाली कांग्रेसका सहमहामन्त्री डा.प्रकाशशरण महतले सरकारले आफू विरुद्धको आलोचना सहन नसक्ने अवस्थामा पुगेको र पछिल्लो समयमा प्रेसमाथिकै हमलामा उत्रिएको भन्दै यस्त कार्य लोकतन्त्रमा कदापि मान्य नहुने बताएका छन् ।
काठमान्डु प्रेस नामक अनलाइन पत्रिकाले चीनबाट मेडिकल सामान खरिदका विषयमा ‘महँगो स्वास्थ्य सामग्री खरिद गरेको र त्यसमा रक्षामन्त्री र प्रधानमन्त्रीका सल्लाहकारका छोराको संलग्नता रहेको भन्ने सामाचार प्रकाशित गरेको विषयलाई लिएर सत्ताक़ो दुरुपयोग गरी सत्ताको दबावमा वेब डेभलपर नै लगाएर समाचार पोर्टलभित्रै गएर प्रकाशित समाचार हटाउन लगाएको भनी आएको विषय निकै गम्भीर र सत्ताको आडमा गरिएको एक अक्षम्य गल्ती भएको बताएका छन् ।
यस विषयप्रती नेपाली काँग्रेसको गम्भिर ध्यानाकर्षण भएको उनले आफ्नो फेसबुक स्टाटसमार्फत बताएका छन्। यस हर्कतले प्रेस स्वतन्त्रतता माथि ठुलो आक्रमण त भएकै छ यस कार्यले स्वास्थ्य सामग्री खरिदमा भएको ठुलो आर्थिक अनियमितातर्फ पनि थप संकेत गर्दछ । डा महतले यस प्रकरणमा सम्बद्ध निकायले तुरुन्त छानबीन गरी दोषीलाई तुरुन्त कारबाही गर्न पनि उनले माग गरेका छन् ।
सहमहामन्त्री महतले प्रेस स्वतन्त्रता कुनै पनि लोकतान्त्रिक राज्यको गहना हो र यस्तो स्वतन्त्र प्रेस एवं नागरिकको वाक तथा अभिव्यक्ति स्वतन्त्रताका लागि नेपाली काँग्रेसले आजमात्र नभएर विसं २००७ सालदेखि लडेको स्मरण गर्दै संविधानले नै आफ्नो मौलिक हकमा व्यवस्था गरेको स्वतन्त्र प्रेसको मूल्य मान्यता विपरीत गएर यदि कसैले कुनै काम गर्छ भने नेपाली काँग्रेसलाई त्यो कदापि मान्य नहुने बताएका छन् ।
साथै उनले सरकार अहिलेको महामारीजस्तो संवेदनशील समयमा पनि गम्भीर बन्न नसकेको र उसका अनियमिताका कर्तुतहरुमा लेखिएका समाचारका कारण पछिल्लो समयमा विक्षिप्त बन्दै सत्ताको आडमा प्रेसमाथि हमला गर्नेजस्ता कार्यमा लागेकोले यस्ता कार्य तत्कालै रोक्न र प्रेस जगतले स्वतन्त्र रुपमा काम गर्ने वातावरण सृजना गर्न उनले माग गरेका छन् ।
