काठमाडौं । नेपालमा कोरोना भाइरस संक्रमितको संख्या ४४४ पुगेको छ । बिहीबार बिहानै थप १७ जनामा कोरोना संक्रमण पुष्टि भएपछि यो संख्या ४४४ पुगेको स्वास्थ्य तथा जनसंख्या मन्त्रालयले जनाएको छ ।
बीपी कोइराला स्वास्थ्य विज्ञान प्रतिठान धरान र प्रादेशिक प्रयोगशाला विराटनगरमा गरिएको परीक्षणअनुसार नयाँ १७ जना थपिएका हुन् ।
झापाको कचनकवल गाउँपालिकाका १५ जना, सुनसरीका एक जना र धनकुटाका एक जना थपिएको मन्त्रालयले जनाएको छ ।
कचनकवल गाउँपालिका ३, ६ र ८ वडा निवासी १८ देखि ४६ वर्ष उमेरका पुरुषहरु रहेको पनि बताइएको छ ।
त्यस्तै धनकुटा निवासी ३४ वर्षीय पुरुष, सुनसरी धरान उपमहानगरपालिका निवासी ५१ वर्षीया महिला संक्रमित थपिएका छन् ।
उनीहरुको स्वास्थ्य अवस्था सामान्य रहेको मन्त्रालयले जनाएको छ ।
बिहीबार बिहान ६ः५० बजे अध्यावधिक गरेको मन्त्रालयले प्रेस विज्ञप्ति भने आफ्नो पेजमा ८ः४८ बजेमात्र पोष्ट गरेको थियो ।
