बिर्तामोड। नेकपाका नेताहरु संलग्न रहेको झापाको बालुवाटार जग्गा काण्डका मुख्य आरोपित व्यक्ति गगन पुरीलाई सम्पति शुद्धिकरण विभागले नियन्त्रणमा लिई विशेष अदालतमा पेश गरेको छ । केहि समयदेखि फरार रहेका पुरी विभागमा आफै हाजिर हुन पुगेपछि उनलाई विभागका अधिकारीहरुले विशेष अदालतमा पुर्‍याएका थिए । विशेषले उनलाई १५ दिन हिरासतमा राखेर अनुसन्धान गर्न म्याद दिएको छ। अदालतपछि उनलाई स्वास्थ्य परिक्षण गर्न अस्पताल लगिएको छ। बालुवाटार भाग २ का नाममा चर्चित सो जग्गा काण्डलाई ढाकछोप गर्न नेकपाका केही नेताहरु लागिपरे पनि अन्तत पुरी आफै विभाग गई कानुनी प्रक्रिया सामाना गर्न तयार भएका हुन् । 

झापा बालुवाटारको जग्गा घोटाला काण्ड नेपालको अहिलेसम्मकै ठूलो जग्गा घोटाला काण्डको रुपमा देखिएको छ । नेपाल प्रहरीको सिआईबीले सो जग्गा घोटाला छानबिन गरेको हो। सिआईबीले अहिलेसम्मको सबैभन्दा ठूलो भ्रष्टाचार छानविन बालुवाटार घोटाला काण्ड भएको बताइएको छ ।

के हो घोटाला काण्ड?

झापाको दमक नगरमा राजमार्गबाट दक्षिणतर्फ बालुवाटार वडा नम्बर ८ मा पर्छ । काठमाडौंको बालुवाटारमा प्रधानमन्त्री केपी शर्मा ओलीको निवास छ भने झापाको बालुवाटारमा नेकपाको भव्य पार्टी कार्यालय छ। सो कार्यालयको दक्षिणतर्फ ठूलो फाँट छ। त्यहिँको जग्गा झापाका नेकपाका प्रभावशाली नेता गगन पुरीको समूहले किर्ते गरेको हो। रतुवा नदीबाट पश्चिम र दिपेनी खोलाबाट उत्तरमा रहेको सो ठाउँको जग्गा कठ्ठाको ५० लाखभन्दा धेरै पर्छ । अहिलेसम्म प्राप्त जानकारी अनुसार करिब ५० बिगा जग्गा घोटाला भएको छ । ५० बिगाको करिब ५ अर्ब रुपैयाँ हुन आउँछ।

सो जग्गामा विगतमा करिब ८८ परिवार सुकुम्वासी बस्थे । उनीहरुलाई जग्गा दिने प्रक्रिया सुरु गरिएको थियो । तर २०४० सालतिर रतुवा खोलामा बाढी आउँदा बस्ती बगायो । पूरै वस्ती बालुवाले भरियो । उनीहरुले ठाउँ छाड्नपर्यो । जग्गाको लालपुर्जा पनि सुकुम्वासीले पाएनन् । पछि रतुवा खोलामा तटवन्ध बनाइयो । तटबन्ध बनेपछि विगतमा डुबेको जग्गा मूल्यवान जग्गामा परिणत भयो । सो जग्गा किर्ते गरे हत्याउने काम गरे नेकपाका नेता गगन पुरीले । उनी दमक नगरपालिकामा तत्कालीन माओवादीबाट मेयरमा उम्मेदवार बनेर पराजित भएका थिए ।

यसरी गरियो कीर्ते

बालुवाटारको जग्गामा लालपुर्जा पाउने भनी सुकुम्वासीहरुको नाममा दर्ता थियो । पछि त्यहाँ सर्पट नापी गरियो । नापी गर्दा सुकुम्वासी परिवार त्यहाँ थिएनन् । गगनले एकलौटी नापी गराए । त्यसपछि गगनले आफ्नो तथा परिवारको नाममा धनीपूर्जा बनाउने प्रयास गरे तर सुकुम्वासीको नामको जग्गा अरुलाई दिन नमिल्ने देखियो । गगनले जग्गा हत्याउन पाएनन् । त्यसपछि गगन पुरीले नापी र मालपोतका कर्मचारी प्रयोग गरेर ती कार्यालयको ढड्डामा विभिन्न व्यक्तिको नाम चढाएर जग्गा लिन खोजे । गत चार वर्ष बीचमा गगनको समूहले यी सबै काम गरेको अनुसन्धानबाट खुलेको छ ।

सिआईबीले गरेको छानविनमा के देखिएको छ भने विगतमा सुकुम्वासीहरुको जग्गा र त्यहाँ रहेका अन्य ऐलानी जग्गाहरुको कित्ता नम्बर नै परिवर्तन गरेर गगनको समूहले लिएको छ । यसरी लिनका लागि नापी कार्यालयको ढड्डामा पाना थप गरिएको छ । मालपोत कार्यालयको ढड्डामा पनि पाना थप गरिएको छ । सरकारी खाता किताबमा पाना नम्बर हुन्छ । खाताकिताबमा पछि पाना थप्न पाइँदैन । गगनको समूहले नापी र मालपोत कार्यालयका खाताकिताबमा पछि पाना थप्न लगाएर सो अनुसारको किर्ते धनीपुर्जा बनाएको हो। गगनको समूहमा रहेका केही कर्मचारीलाई प्रहरीले पक्राउ गरेको छ भने कैयन कर्मचारी फरार छन् ।कर्मचारी प्रयोग गरेर श्रेष्ता किताबमै पाना थपेर गगनको समूहले जग्गा हत्याएको हो ।

त्यसरी धनीपुर्जा बनाइएकामध्ये एक ओमप्रकाश पौडेल पनि हुन् । उनको नाममा करिब १३ बिगा जग्गा देखिएको छ । प्रहरीले उनलाई पक्राउ गर्यो । उनले गगन पुरीले आफ्नो नाममा जग्गा राखेको वयान सिआईबीलाई दिए । कीर्ते कागज सम्पूर्ण गगनले नै बनाइदिएको खुलासा गरे । उनी मोरङका एक गरिब किसान तथा साधारण मजदुर भएको बताइएको छ । सिआईबीले खोज्दै जाँदा सो क्षेत्रको करिब ५० बिगाहा जग्गा गगनले विभिन्न नाममा राखेको खुल्यो । गगनले आफ्नै नाममा समेत जग्गा राखेको पाइयो ।

फरार थिए गगन
सिआईबीले गगनको घरमा छापा मार्यो । उनी फरार भए । उनको घरबाट दर्जनौं किर्ते कागज फेला पारेको थियो । उनले गगन पुरी र रेवतराज पुरी दुई नाममा नागरिकता बनाएको समेत पाइयो । दुईटा नागरिकता बनाएको विषयमा पनि गगन विरुद्ध सर्वोच्च अदालतमा मुद्दा चलिरहेको छ । घरमा छापा मारिएपछि फरार भएका गगनलाई जोगाउन नेकपाका कतिपय नेताहरु लागेका थिए । उनले बालुवाटारमा किर्ते गरी कब्जा गरेको जग्गा जोगाएर भित्रभित्रै बाँडफाँड गर्ने दाउमा लागेको स्थानियहरु बताउँछन् । दमक बालुवाटार जग्गा प्रकरणमा अहिले मुख्य रुपमा देखिएका गगन पुरी बाहेक झापाका नेकपाका कैयौं नेताहरु पनि संलग्न भएको आशंका गरिँदैछ । त्यसैकारण बालुवाटार जग्गा घोटाला प्रकरणबाट सिआईबीको अनुसन्धानलाई निष्क्रिय तुल्याउने प्रयास भइरहेको बुझिन्छ ।

सुमार्गीको डिज्ने पार्क यहि किर्ते जमिनमा

दमकमा विश्व स्तरीय डिज्ने पार्क बनाइने भनी प्रचारमा आएको छ । नेपालका चर्चित नवधनाढ्य अजेयराज सुमार्गी, प्रधानमन्त्रीका स्वकिय सचिव इन्द्र भण्डारी, नेकपा केन्द्रीय सदस्य देवेन्द्र दाहाल, दमकका ठेकेदार गणेश बस्नेत लगायतका नेताहरुको १६ अर्ब रुपैयाँ लगानीमा बनाइने भनिएको डिज्ने पार्क यही बालुवाटारमा हो र जग्गा पनि गगनले किर्ते गरेर लिएको जग्गा नै हो । गगनले एकातिर डिज्ने पार्क बनाउने भनेर प्रक्रिया चलाइरहेका थिए भने अर्कातिर जग्गा बेच्न पनि प्रयास गरिरहेका थिए । तर नापी कार्यालयले जग्गा बेच्न कित्ताकाट गर्न मानिरहेको थिएन । गगनले राजनीतिक दवाब दिइरहेका थिए । अवैध र कीर्ते जग्गा र धनीपुर्जाको आधारमा कित्ताकाट गरेर जग्गा किनबेच गराउन नापि कार्यालयभित्र प्रक्रिया थालिएको थियो । तर, केही कर्मचारीले फसिन्छ भन्दै मानिरहेका थिएनन् । गगनको समूहले कडा राजनीतिक दवाब दिन थालेपछि केही इमानदार कर्मचारीले सिआईबीलाई यो जानकारी दिए । त्यसपछि मात्र जग्गा घोटालाको पोल खुलेको हो ।

गगनको समूहले झापा र मोरङको अन्य ठाउँमा पनि जग्गा घोटाला गरेको हुनसक्ने भन्दै सिआईबीले छानबिन अगाडि बढाइरहेको छ । छानबिन अगाडि बढेको अवस्थामा नेकपाका धेरै नेताको पोल खुल्नसक्ने भएकाले झापा बालुवाटार जग्गा घोटाला काण्डलाई ढिसमिस पारिने सम्भावना बढेकै बेला पुरीले विभागमा अचानक गरेको समर्पणले भने अनेक आशंका गरिएको छ। स्मरणीय छ विभाग अहिले प्रधानमन्त्री मातहत नै रहेको छ। पुरी मुख्य आरोपित रहेको बालुवाटार जग्गामा प्रस्तावित डिज्ने पार्कमा प्रचण्ड निकटका व्यापारी सुमार्गी र प्रधानमन्त्रीका स्वकीय सचिव भण्डारी संलग्न हुनु र उनै पुरीको मुद्धा सम्पती शुद्धिकरणले हेर्नु र उनी समर्पण गर्न पुग्ने कुरालाई संयोग मात्र मान्न सकिने अवस्था भने नरहेको उो प्रकणलाई नजिकबाट नियालेका नेकपाकै नेताहरु बताउँछन्।

• नेकपाका फरार नेता गगनको ठगी र अत्याचारविरुद्ध स्थानीयले खोले मुख
• बालुवाटार काण्डका आरोपी गगनले अख्तियार प्रमुख घिमिरेको नाम लिएपछि
• सुमार्गीले १६ अर्बको फनपार्क बनाउदै, ओली र प्रचण्डबाट शिलान्यास गराउने तयारी
• नेकपाका नेताहरुलाई बालुवाटार देख्नै नहुने, झापामा किर्ते गरि ५० विघा हत्याए