काठमडौं । कप्तान लियोनल मेस्सीको दुई गोलको मद्धतले स्पेनिश ला लिगा फुटबलमा बार्सिलोनाले जित निकालेको छ । महत्वपूर्ण जितसहित उपाधि दाबेदार बार्सिलोना लिग तालिकाको तेस्रो स्थानमा पुगेको छ ।
बुधबार राति भएको खेलमा बार्सिलोनाले एथ्लेटिक बिल्बाओलाई उसकै मैदानमा ३–२ गोल अन्तरले पराजित गरेको हो ।
यो बार्सिलोनाको पुनरागमन जित थियो । खेलको तेस्रो मिनेटमै इनाकी विलियम्सले गोल गर्दै बिल्बाओलाई अग्रता दिलाएका थिए ।
खेलको १४ औं मिनेटमा पेड्रीले गोल गर्दै बार्सिलोनालाई १–१ गोलको बराबरीमा फर्काए । खेलको ३८ औं मिनेटमा मेस्सीले पहिलो गोल गर्दै बार्सिलोनालाई २–१ को अग्रता दिलाए ।
खेलको ६२ औं मिनेटमा मेस्सीले दोस्रो गोल गर्दै बार्सिलोनालाई ३–१ को स्थितिमा पुर्याए । इन्जुरी समयमा बिल्बाओका इकर मुनियनले एक गोल फर्काएका थिए ।
यो शानदार जितसँगै बार्सिलोनाले १७ खेलमा ३१ अंक जोडेर आफूलाई तेस्रो स्थानमा पुर्याएको छ ।
लिगमा १५ खेलबाट ३८ अंकसहित लुइस सुआरेज रहेको एथलेटिको मड्रिड शीर्ष स्थानमा छ । १७ खेलबाट ३६ अंकसहित डिफेन्डिङ च्याम्पियन रियाल मड्रिड दोस्रो स्थानमा छ ।
