सर्वोच्च अदालतबाटै राष्ट्रपति र प्रधानमन्त्री कार्यालयको फाइल गायब
प्रकाशित २०७७ माघ २ शुक्रबार
2k
Shares
काठमाडौं । सर्वोच्च अदालतबाटै संसद विघटनका विषयमा राष्ट्रपति कार्यालय र प्रधानमन्त्री कार्यालयले पठाएको जवाफी फाइल गायब भएको छ । शुक्रबारको संवैधानिक इजलासको सुनुवाइका क्रममा रिट निवेदकका तर्फबाट वरिष्ठ अधिवक्ता रमण श्रेष्ठले राष्ट्रपति र प्रधानमन्त्री कार्यालयले पठाएको फाइल मागेपछि गायब भएको रहस्य खुलेको हो ।
वरिष्ठ अधिवक्ता श्रेष्ठले प्रधानमन्त्री कार्यालयले पठाएको पत्रमा संविधानको धाराको उल्लेख नभएको तर राष्ट्रपति कार्यालयबाट आएको पत्रमा धारा उल्लेख भएको भन्दै निरन्तर फाइल माग गर्न थालेपछि प्रधानन्यायाधीश चोलेन्द्रशमशेर राणाले सुनुवाइकै क्रममा २८ पुसमा फिर्ता गर्ने गरी फाइल फिर्ता पठाइएको जानकारी गराएका छन् ।
प्रधान न्यायाधीशको सो जवाफपछि संवैधानिक इजलासमा न्यायाधिश र रिट निवेदकहरुबीच चर्काचर्की नै परेको छ । फाइल माग भएपछि इजलासको प्रत्यक्ष प्रशारणको साउन्ड नै केहिबेर म्युट गरिएको हो । रिट निवेदकका तर्फबाट सुनुवाइमा सहभागी नेकपा नेतृ शशि श्रेष्ठले वरिष्ठ अधिवक्ता श्रेष्ठबाट फाइल माग भएपछि २८ पुसमा फिर्ता गर्ने गरी फाइल फिर्ता पठाइएको भन्दै प्रधान न्यायाधीश राणाले जानकारी गराएको बताइन।
संसद विघटन असंवैधानिक भएको भन्दै रिट परेपछि सर्वोच्चले ५ पुसमा बसेको मन्त्रिपरिषदको निणर्य र राष्ट्रपतिसमक्ष पेश भएको सिफारिसको सक्कल माग गरेको थियो ।
