अष्टलक्ष्मी शाक्य लगायतका नेताहरु पक्राउ, दुई घाइते
अधिकांश नेताहरु सडकमा
प्रकाशित २०७७ माघ २२ बिहिबार
363
Shares
काठमाडौं । नेपाल कम्युनिष्ट पार्टी (नेकपा) प्रचण्ड– नेपाल समूहको बन्द आह्वान सफल बनाउन सडकमा उत्रेका नेताहरुलाई प्रहरीले धमाधम पक्रन थालेको छ । बिहानै काठमाडौंको कलंकीबाट नेकपा स्थायी कमिटी सदस्य एवं प्रदेश सांसद अष्टलक्ष्मी शाक्य लगायतका नेताहरु पक्राउ परेका छन् ।
केन्द्रीय सदस्य हितमान शाक्य, अमृता थापालगायत केन्द्रीय नेता पनि पक्राउ परेका छन् ।
शाक्यले कलंकी, बालाजु, सोह्रखुट्टे, गंगबु, चाबहिल, बागबजार लगायतका स्थानबाट पक्राउ गरेर महाराजगञ्जमा ल्याएको बताइन् । उनले झण्डै ५० जनालाई ल्याएर एकैठाउँमा राखिएको बताइन् ।
उनले दुई जना घाइते भएको बताइन् । उनले घाइतेको उपचारका लागि आफूले डीएसपीलाई फोन गरेर बोलाएको बताइन् । घाइतेहरुको टाउको फुटेको छ भने खुट्टा भाँचिएको छ । त्यस्तै आँखामा पनि चोट लागेको उनले बताइन् ।
त्यस्तै नेकपा नेता विष्णु रिजालका अनुसार कृष्ण केसी लगायतका नेताहरु चाबहिलबाट, रमेश मल्ल लगायतका नेताहरु बागबजारबाट पक्राउ परेका छन् ।
त्यस्तै नेकपा नेता रामप्रसाद सापकोटा दीपशिखाका अनुसार गंगगुबाट नेकपाका कार्यकर्ताहरु पक्राउ परेका छन् ।
