जनकपुरमा प्रचण्ड-नेपाल समूहको आम हडतालको प्रभाव न्यून

निरञ्जन कुमार साह,

प्रकाशित २०७७ माघ २२ बिहिबार

जनकपुरधाम । नेकपा प्रचण्ड-नेपाल समूहले गरेको आम हडताल जनकपुरधाममा आंशिक प्रभाव देखिएको छ । नेकपा प्रचण्ड-नेपाल समूहले बिहीबार बन्द सफल पार्न जनकपुरधाममा पनि बन्द गराउन थाले पनि बजार खुल्लै रहेका छन् ।

नेकपा प्रचण्ड-नेपाल समूहले बन्द गराउँदै जनकपुरधामको विभिन्न चोकहरूमा समेत बन्द गराए पनि बन्द असर न्यून परेको छ। नेपाल बन्दको प्रभाव पूर्व पश्चिम राजमार्ग सुनसान देखिएको छ भने बजार पसलहरू सबै खुलेका हुन् ।

प्रदेश २ को राजधानी जनकपुरधामको पसल बजार खुलेको छ भने बजारमा साना सवारी निर्बाध चलिरहेका छन् ।

जनकपुरधामवाट चल्ने लामो दुरीका सवारी साधन भने चल्न सकेको छैन । प्रधानमन्त्री केपी शर्मा ओलीले गरेको संवैधानिक निकायमा पदपूर्तिको निर्णय असंवैधानिक र एक पछि अर्को संविधान विपरीतको काम गरेको भन्दै नेकपाको प्रचण्ड-नेपाल समूह आम हडतालको घोषणा गरेको हो ।

आन्दोलनकारीहरू जनकपुरमा फाट्टफुट्ट विरोध प्रदर्शन गरे पनि बजार खुलेको छ । यद्द्पी लामो दुरीको यातायात बन्द भए पनि छोटो दुरीका सवारी साधन खुल्ला रहेको छ।

धनुषामा त्यस्तो कुनै अप्रिय घटना नभएको जिल्ला प्रहरी कार्यालय धनुषाले जानकारी दिए।