दुई लाख कार्यकर्ता दरबारमार्गमा, ओलीसहित तीन नेताको सम्वोधन
प्रकाशित २०७७ माघ २३ शुक्रबार
400
Shares
काठमाडौं । नेपाल कम्युनिष्ट पार्टी (नेकपा) को ओली समूहको जनसभा शुक्रबार दरबारमार्गमा हुँदैछ । प्रधानमन्त्री एवं नेकपा ओली समूहका अध्यक्ष केपी शर्मा ओलीले सम्वोधन गर्ने उक्त सभामा दुई लाख कार्यकर्ता उतारिने प्रदेश संगठन कमिटी अध्यक्ष आनन्दप्रसाद पोखरेलले जानकारी दिएका छन् ।
उनका अनुसार काठमाडौंका तीन जिल्लाबाट र केही नजिकका जिल्लाबाट गरी दुई लाख कार्यकर्ता नारायणहिटी संग्रहालय अगाडि हुने जनसभामा सहभागी हुनेछन् ।
उक्त जनसभामा प्रधानमन्त्री ओलीसहित तीन जना शीर्ष नेताहरुले सम्बोधन गर्ने भएका छन् । ‘अराजकताको अन्त्य, भौगोलिक अखण्डता, संविधानको रक्षा गर्दै विकास र समृद्धिमार्फत राजनीतिक स्थायित्वका लागि ताजा जनादेश’ भन्ने नाराका साथ हुने जनसभालाई प्रधानमन्त्री ओली, उपप्रधानमन्त्री ईश्वर पोखरेल र गृहमन्त्री रामबहादुर थापा ‘बादल’ ले सम्बोधन गर्ने भएका हुन् ।
नेकपा बागमती प्रदेश सङ्गठन कमिटीले सभामा काठमाडौँ उपत्यकासहित बागमती प्रदेशका १३ जिल्ला र देशभरिबाट पार्टी नेता, कार्यकर्ता र समर्थक आउने बताएको छ ।
मध्याह्न १२ बजेदेखि हुने सभाअघि काठमाडौँ उपत्यकाका १३ स्थानबाट सांगीतिक प्रस्तुतिसहित जुलुस निकालिने जनाइएको छ ।
पार्टीमा देखिएको सङ्कटबारे जानकारी दिन, सरकारले गरेका राम्रो कामको प्रचार गर्न, ताजा जनादेशमा जान र कम्युनिष्ट आन्दोलनलाई अझ एकताबद्ध गराउन सभा गर्न लागिएको आयोजकले जनाएको छ ।
सरकारले ताजा जनादेशमा जान भन्दै प्रतिनिधि सभा विघटन गरी आगामी बैशाख १७ र २७ गते आम निर्वाचनको घोषणा गरेको छ । तर यो मुद्दा सर्वोच्च अदालतमा विचाराधीन रहेकाले चुनाव हुने नहुने टुंगो छैन ।
प्रधानमन्त्रीले यो सम्बोधनमार्फत विशेष नयाँ कुरा बताउने दाबी उनी पक्षीय नेताहरुले गर्दै आएका छन् । विभिन्न सामाजिक संजालमार्फत नारायणहिटी अगाडि सम्वोधन गरेर ओलीले नेपाललाई हिन्दू राष्ट्र घोषणा गर्नेसमेत चर्चा चलाइएको छ ।
प्रतिनिधिसभा विघटन भएपछि फुटेको नेकपाको प्रचण्ड–नेपाल समूहले काठमाडौंमा बृहत सभा गरेको थियो । उक्त सभामा भेला भएका कार्यकर्ताप्रति व्यङ्ग्य गर्दै ओलीले सभा कस्तो हुन्छ २३ गते देखाइदिने बताएका थिए ।
यसका लागि पनि यो समूहले जिल्लाजिल्लाबाट कार्यकर्ता भेला गरेको जनाइएको छ । बिहीबारमात्र सुरक्षाकर्मीको स्कर्टिङमा गाडीमा कार्यकर्ताहरु ल्याइएको बताइएको छ ।
मध्यान्ह १२ बजेपछि दरबारमार्गमा कार्यक्रम हुनेछ । त्यसअघि उपत्यकाका विभिन्न रुटबाट नारा जुलुससहित सभास्थलमा नेता कार्यकर्ता पुग्नेछन् ।
यस्तो छ रुट–
जनसभाका लागि र्यालीमा आउने कार्यकर्ता तथा शुभेच्छुकहरुका लागि काठमाडौं उपत्यका भित्रका विभिन्न १६ रुट निर्धारण गरेको छ ।
बागबजार, प्रदर्शनीमार्ग, महेन्द्र शालिक पूर्व, घण्टाघर, नेपाल एअरलाइन्स अगाडि, त्रिपुरेश्वर, गौशाला, माइतीघर, पुतलीसडक, लैनचौर, सोर्हखुट्टे, टेकु, बसन्तपुर, ज्ञानेश्वर, पुरानो बानेश्वरलाई र्यालीको रुट क्षेत्र तोकिएको हो ।
यिनै रुटहरुबाट भेला जम्मा भएर दरबारमार्ग पुग्नेछन् ।
बुधबार र बिहीबार ट्रेलर
ओली समूहले राजधानीमा बुधबार र बिहीबार शुक्रबारको जनसभाका लागि ट्रेलर देखाएको थियो । उक्त समूहले बुधबार करिब १० हजार मोटरसाइकलसहित र्याली निकालेको थियो ।
ओली पक्षीय नेकपाको भ्रातृ संस्था राष्ट्रिय युवासंघ नेपालले उपत्यकामा बुधबार बृहत मोटरसाइकल र्याली निकालेको हो । मध्यान्ह ललितपुरको बालकुमारी पुलबाट शुरु भएको र्याली सातदोबाटो, लगनखेल, जाउलाखेल, थापाथली, त्रिपुरेश्वर, एनएसी, जमल, दरबारमार्ग नारायणहिटी, कमलपोखरी, रातोपुल, गौशाला, एयरपोर्ट हुँदै तीनकुने पुगेर टुंगिएको थियो ।
त्यस्तै बिहीकार प्रचण्ड–नेपालको आमहड्तालका बीच काठमाडौंको प्रदर्शनीमार्गमा मार्चपास निकालिएको थियो । उक्त मार्चपासको नेतृत्व महेश बस्नेतले गरेका थिए ।
बस्नेतले जनसभालाई आफूहरुले नै सुरक्षा दिन सक्छौं भन्ने दाबीका साथ मार्चपास निकालिएको बताएका थिए ।
