काठमाडौं। फागुनको पहिलो हप्ताबाट संयुक्त आन्दोलन गर्न नेपाल कम्युनिस्ट पार्टी (माधव–नेपाल) पक्षले गरेको औपचारिक तथा अनौपचारिक प्रस्तावलाई तेश्रो ठूलो दल जनता समाजवादी पार्टीका नेताहरुले अस्विकार गरेका छन् । नेकपासँग मिलेर संयुक्त आन्दोलनमा जान नसकिने निष्कर्ष जसपाका नेताहरुले गरेका छन् । नेपाली कांग्रेसको लाइन झै एक्लै आन्दोलन गर्ने घोषणा जसपाका नेताहरुले गरेका छन् । संसद् विघटनविरुद्ध जसपा अहिले तेश्रो चरणको आन्दोलन गरिरहेको छ । तेश्रो चरणको आन्दोलन माघ मसान्त पछि समाप्त हुनेछ ।

जसपाका नेता डा.सुरेन्द्र झाले नेपाल कम्युनिस्ट पार्टीको प्रचण्ड-माधव खेमा पक्षले भन्ने गरे जस्तो संयुक्त आन्दोलनमा जसपा सहभागी नहुने प्रष्ट पारे । ‘अहिले हामीले सर्वोच्चको फैसला पर्खेका छौ ।  सर्वोच्चले जे निर्णय गर्छ, त्यसलाई स्विकार गर्छौ । तर तत्काल संयुक्त आन्दोलनमा जाने सम्भावना छैन’ झाले भने,‘अहिले नेकपाको प्रचण्ड-नेपाल पक्षले गरेको आन्दोलन प्रधानमन्त्री हुन पाइन, भागबण्ड मिलेन, भनेर गरेको जस्तो देखिएको छ । त्यसैले उहाँहरुको यो आन्दोलनमा हामी किन सहभागी हुने ?’

लोकतान्त्रिक पार्टीले सर्वोच्चले गरेको निर्णयलाई स्विकार गर्नुपर्ने उनले बताए । ‘मानौ अहिले हामीले संयुक्त आन्दोलन गर्‍यौ तर भोली सर्वोच्चले चुनावको पक्षमा फैसला गर्‍यो भने आन्दोलनबाट फर्केर चुनावमा जानुपर्ने अवस्था आउँछ ’ झाले भने,‘त्यसैले अहिले संयुक्त आन्दोलनमा जाने सम्भावना छैन ।’

पार्टी स्रोतका अनुसार जसपाभित्र अहिले दुई लाइन देखिएको छ । एउटा लाइन प्रचण्ड-माधव पक्षसँग निकट देखिएको छ भने अर्को लाइन प्रधानमन्त्री ओली पक्षसँग निकट देखिएको छ । ओलीसँग निकट देखिएको लाइन आन्दोलनभन्दा चुनावको तयारीमा पार्टीले ध्यान दिनुपर्ने अडानमा छ भने माधव-प्रचण्ड पक्ष लाइनका नेताहरु चुनावको तयारी भन्दा आन्दोलनलाई प्राथमिकता दिनुपर्ने धारणा राख्दै आएका छन् ।

जसपाको पहिलो अध्यक्ष महन्थ ठाकुर आन्दोलनभन्दा चुनावको तयारीमा पार्टी जुट्नु पर्ने अडानमा छन् । उनलाई राजेन्द्र महतो, शरतसिंह भण्डारी, सर्बेन्द्रनाथ शुक्ल, विर्खेशचन्द्र लाल लगायतका नेताहरुले साथ दिएका छन् । खासगरी पूर्व राजपाका धेरैजसो नेताहरु चुनावको तयारीलाई महत्व दिनुपर्ने पक्षमा छन् । तर उपेन्द्र यादव भने चुनावको तयारीलाई भन्दा आन्दोेलनमा जानुपर्ने पक्षधर नेताहरुको नेतृत्व गर्दै आएका छन् ।